وزیراعلیٰ پنجاب کے اعتماد کا ووٹ لینے کے معاملے میں پی ٹی آئی اور ق لیگ نے مشترکہ پارلیمانی پارٹی اجلاس طلب کرلیا۔ 

پاکستان تحریک انصاف اور مسلم لیگ (ق) کا مشاورتی اجلاس ختم ہوگیا۔ اجلاس چیئرمین پی ٹی آئی عمران خان کی زیر صدارت ہوا جب کہ (ق) لیگ کی نمائندگی سابق وفاقی وزیر مونس الہی نے کی۔

ذرائع نے بتایا ہے کہ مشاورتی اجلاس میں وزیراعلی پنجاب کے اعتماد کا ووٹ لینے کے حوالے سے حکمت عملی پر مشاورت کی گئی اور 2 جنوری کو پارلیمانی پارٹیوں کا اجلاس طلب کیا گیا ہے۔

یہ بھی پڑھیں؛ وزیر اعلیٰ پرویز الٰہی با آسانی اعتماد کا ووٹ حاصل کریں گے 

اجلاس میں فیصلہ کیا گیا کہ (ق) لیگ اور پی ٹی آئی کا مشترکہ پارلیمانی پارٹی اجلاس ہوگا ، اجلاس میں تمام اراکین کی حاضری کو یقینی بنایا جائے گا اور تمام اراکین کی ایک روز قبل لاہور میں موجودگی یقینی بنائی جائے۔

ذرائع کا کہنا تھا کہ وزیراعلیٰ پنجاب کے اعتماد کے ووٹ کے لیے اجلاس میں حکمت عملی طے کی جائے گی جب کہ پارلیمانی پارٹی کے اجلاس کے بعد کسی بھی روز اعتماد کے ووٹ لیے جانے کا امکان ہے۔

یاد رہے کہ پنجاب اسمبلی کے اسپیکر سبطین خان نے گورنر پنجاب کی جانب سے وزیراعلی کے اعتماد کے ووٹ کے لیے صوبائی اسمبلی کا اجلاس طلب کرنے کے حکم کو غیرقانونی قرار دیا تھا۔

اور اس حوالے سے دی گئی رولنگ میں اسپیکر نے موقف اختیار کیا کہ اسمبلی کا اجلاس پہلے ہی سے چل رہا ہے لہذا اس دوران نیا اجلاس نہیں بلایا جا سکتا۔

بعد ازاں گورنر پنجاب بلیغ الرحمان نے اسپیکر پنجاب اسمبلی کی رولنگ کو غیر آئینی اور غیر قانونی قرار دیا تھا۔