جرمنی کے ایک معروف وائرولوجسٹ نے دعویٰ کیا ہے کہ کرہ ارض سے عالمی وبائی مرض کورونا اب ختم ہو گیا ہے۔

تفصیلات کے مطابق کورونا وائرس پر تحقیقات کے جرمن ماہر کرسچن ڈورسٹن کے خیال میں کورونا وائرس کی وبا دنیا بھر میں اب ختم ہو چکی ہے اور اب یہ ایک عام اور مقامی بیماری ہے۔

جرمن وزیر انصاف نے بھی اس وبا کے حوالے سے عائد آخری پابندیوں کو بھی ختم کرنے کا مطالبہ کیا ہے۔

جرمنی کے ایک مقامی اخبار سے بات چیت کرتے ہوئے متعدی بیماریوں اور وائرس کے جرمن ماہر کرسچن ڈورسٹن نے کہا کہ کورونا وباء کو ختم سمجھنے پر غور کیا جا سکتا ہے کیونکہ یہ اب عام اور مقامی بیماری میں تبدیل ہو چکی ہے۔

برلن کے چیریٹی یونیورسٹی ہسپتال میں شعبہ وائرولوجی کے سربراہ نے عالمی وبا کے پیچھے کورونا وائرس کا حوالہ دیتے ہوئے کہا کہ ہم اس موسم سرما میں سارس کووڈ 2 کی پہلی مقامی لہر کا سامنا کر رہے ہیں.

کرسچن ڈورسٹن کے اندازے کے مطابق وبا اب ختم ہو چکی ہے، گزشتہ روز شائع ہونے والے تبصروں میں ڈورسٹن نے کہا کہ اس موسم سرما کے بعد آبادی میں قوت مدافعت اتنی وسیع اور لچکدار ہو جائے گی کہ گرمیوں کے دوران وائرس کے پھیلنے کا امکان بہت کم ہو گا۔

جرمنی میں کووڈ 19 کے ماہرین پر مشتمل کونسل کے رکن اور انتہائی نگہداشت کے معالج کرسچن کاراگیانیڈز کا کہنا ہے کہ ممکنہ طور پر رواں موسم سرما میں یہ وبائی مرض ختم ہو جائے گا۔

کرسچن کاراگیانیڈز نے ایک مقامی میڈیا ادارے کے ساتھ انٹرویو کے دوران کہا کہ میں توقع کرتا ہوں کہ عالمی وباء اب تیزی سے اپنا راستہ طے کر لے گی۔

ڈورسٹن نے جرمنی اور دیگر یورپی ممالک میں ویکسی نیشن مہم کی کامیابی کو کورونا وبا کے خاتمے کی اہم وجہ قرار دیا۔

تاہم انہوں نے کہا کہ مثال کے طور پر چین میں ایسا نہیں ہے، جہاں اس وقت کورونا وائرس کا انفیکشن تیزی سے پھیل رہا ہے۔

کرسچن ڈورسٹن نے کورونا وائرس کے خلاف حفاظتی اقدامات کا بھی دفاع کرتے ہوئے کہا کہ اگر احتیاطی تدابیر کے طور پر کچھ بھی نہ کیا گیا ہوتا، تو جرمنی میں ڈیلٹا کی لہروں میں دس لاکھ یا اس سے بھی زیادہ اموات ہو چکی ہوتیں۔

واضح رہے کہ کورونا وائرس کا ڈیلٹا ویریئنٹ 2021 کے وسط میں جرمنی پہنچا تھا۔