آن لائن خریدوفروخت کی سب سے بڑی کمپنی ایمازون نے ہزاروں افراد کو بے روزگار کرنے کا فیصلہ کر لیا ہے۔

کمپیوٹر کی معروف ویب سائٹ نے دعویٰ کیا ہے کہ ایمازون نے چند روز قبل اپنے مینجرز سے کہا ہے کہ وہ ملازمین کے درمیان کارکردگی کے متعلق مسائل کو تلاش کریں تاکہ انہیں فارغ کیا جا سکے۔

کمپیوٹر ورلڈ نامی ویب سائٹ نے اپنی رپورٹ کہا ہے کہ آنے والے مہینوں میں ایمازون بشمول کارپوریٹ ایگزیکٹوز تقریباً 20 ہزار ملازمین کو فارغ کر سکتا ہے۔

عالمی سطح پر 1.6 ملین سے زیادہ افراد کو روزگار مہیا کرنے والی ایمازون ممکنہ طور پر مختلف محکموں کے عملے کو باہر کا راستہ دکھائے گی۔ ان میں تقسیم کار، کارپوریٹ ایگزیکٹوز، اور ٹیکنالوجی کا عملہ شامل ہیں۔

اس معاملے سے واقف گمنام ذرائع کے حوالے سے رپورٹ میں مزید کہا گیا ہے کہ برطرفی کا کمپنی میں تمام سطحوں پر ملازمین پر اثر پڑے گا۔

واضح رہے کہ پچھلے مہینے معروف امریکی اخبار نے رپورٹ کیا تھا کہا کہ ایمازون 10 ہزار ملازمین کو برطرف کرنے کا منصوبہ بنا رہا ہے، جو ٹیکنالوجی کمپنی کی تاریخ میں سب سے بڑی برطرفی ہوگی۔ تاہم اب رپورٹ میں کہا گیا ہے کہ برطرف ملازمین کی تعداد دگنی ہو سکتی ہے۔

ذرائع کے مطابق برطرف کیے جانے والے کارپوریٹ ملازمین کو کمپنی کے کنٹریکٹ کے مطابق 24 گھنٹے کا نوٹس اور علیحدگی کی تنخواہ ملے گی۔

ایک ذریعہ، جس کو برخاست ہونے کے بارے میں براہ راست مطلع کیا گیا تھا، نے کہا کہ ملازمین کو ملازمتوں میں کمی کے بارے میں معلوم ہونے کے بعد سے خوف نے اپنی گرفت میں لے لیا ہے۔

ذرائع نے مزید کہا کہ ایمازون برطرفی کے لیے ایک مخصوص شعبہ یا مقام کو نشانہ بنا رہا ہے اور اس اقدام سے پورے کاروبار میں ملازمین متاثر ہو سکتے ہیں۔

رواں سال اکتوبر میں ایمازون نے اس سال کے چھٹیوں کے موسم کے لیے فروخت میں کمی کی پیش گوئی کی تھی جو عام طور پر ریکارڈ فروخت کا سیزن ہوتا ہے۔

کمپنی نے اس سست روی کا ذمہ دار صارفین اور کاروباری اداروں کو قرار دیا ہے جن کے پاس بڑھتی ہوئی قیمتوں کے درمیان خرچ کرنے کے لیے کم رقم ہے۔

یہ اطلاعات بھی ہیں کہ ای کامرس کمپنی نے کچھ غیر منافع بخش یونٹوں میں اپنے ملازمین کو خبردار کیا کہ وہ کمپنی کے اندر مواقع کی تلاش شروع کریں۔