پرتگالی فٹ بال فیڈریشن (ایف پی ایف) نے کرسٹیانو رونالڈو کے ورلڈ کپ چھوڑنے کی دھمکی کی تردید کی ہے۔

برطانوی خبر رساں ادارے کی خبر کے مطابق پرتگالی اخبار کا دعویٰ ہے کہ 37 سالہ فارورڈ نے یہ دھمکی اس وقت دی جب یہ کہا گیا کہ وہ سوئٹزرلینڈ کے خلاف اپنا آخری 16 کھیل شروع نہیں کرے گا۔

جنوبی کوریا کے خلاف گزشتہ میچ میں پرتگال کے کپتان کرسٹیانو رونالڈو نے متبادل کھلاڑی آنے پر بھی غصے کا اظہار کیا تھا۔

پرتگال فٹ بال فیڈریشن کے مطابق قطر میں قیام کے دوران کرسٹیانو رونالڈو نے کسی بھی وقت قومی ٹیم کو چھوڑنے کی دھمکی نہیں دی۔

واضح رہے کہ کرسٹیانو رونالڈو نے پرتگال کے ورلڈ کپ کے افتتاحی میچ سے قبل ایک متنازعہ انٹرویو کے بعد مانچسٹر یونائیٹڈ کو باہمی معاہدے سے چھوڑ دیا جس میں پانچ بار کے بیلن ڈی آر فاتح نے کلب کو تنقید کا نشانہ بنایا تھا۔

کرسٹیانو رونالڈو کو پرتگال کے دونوں ابتدائی میچز  میں تبدیل کیا گیا تھا جس پر رونالڈو نے شدید ردعمل دیا تھا اور کوچ فرنینڈو سانتوس نے کہا کہ انہیں رونالڈو کا ردعمل پسند نہیں آیا جس پر انہیں سوئزرلینڈ کے خلاف میچ میں نہیں کھلایا گیا۔

سوئزر لینڈ کے خلاف رونالڈو کے بجائے گونکالو راموس نے آغاز کیا اور 21 سالہ کھلاڑی نے 6-1 سے فتح میں ہیٹ ٹرک کی۔

پرتگال کی جانب سے فارورڈ کرسٹیانو رونالڈو نے سب سے زیادہ 195 میچز کھیلے ہیں، انہوں نے ٹیم کی جانب سے سب سے زیادہ 118 گول بھی کیے ہیں۔

سوئزرلینڈ کے خلاف میچ میں کرسٹیانو رونالڈو کو متبادل کے طور پر استعمال کیا گیا، میچ ختم ہونے کے بعد وہ میدان چھوڑ کر چلے گئے تھے حالانکہ ان کے ساتھی میچ میں کامیابی کا جشن منا رہے تھے۔

ایف پی ایف نے مزید کہا کرسٹیانو رونالڈو قومی ٹیم اور ملک کی خدمت میں ہر روز ایک منفرد ٹریک ریکارڈ بناتے ہیں، جس کا احترام کیا جانا چاہیے۔”

فیفا ورلڈ کپ میں ہفتے کے دن پرتگال اور مراکش کوارٹر فائنل میں ٹکرائیں گی۔