فیفا ورلڈ کپ 2022 کے سیمی فائنلز اور فائنل میچز کے لیے نئی فٹ بال استعمال کی جائے گی۔

غیر ملکی میڈیا کی رپورٹس کے مطابق فیفا نے تصدیق کی ہے کہ ورلڈ کپ کے آخری مراحل کے لیے ایک نئی فٹ بال کا استعمال کیا جائے گا جو اس ایونٹ میں استعمال ہونے والی فٹ بال سے مختلف ہے۔

اس فٹ بال کو ’الحلم‘ کا نام دیا گیا ہے جس کے معنی خواب کے ہیں، یہ فٹ بال ورلڈ کپ کے سیمی فائنلز ، فائنل اور تیسری پوزیشن کے پلے آف میچز میں استعمال کی جائے گی۔

فیفا نے آج کہا کہ ایڈیڈاس کا الحلم ماڈل، جو الریحلا کے بعد آتا ہے، قطر میں ہونے والے آئندہ سیمی فائنل اور ورلڈ کپ فائنل میں استعمال کیا جائے گا۔

واضح رہے کہ عربی میں الحلم کا ترجمہ “خواب” اور الریحلہ کا ترجمہ “سفر” کے طور پر ہوتا ہے۔

اس ہفتے کے سیمی فائنل گیمز میں کروشیا کا مقابلہ ارجنٹائن اور فرانس کا مقابلہ مراکش سے ہو گا، مراکش ٹورنامنٹ کی تاریخ میں آخری چار تک پہنچنے والی پہلی افریقی ملک ہے جبکہ سیمی فائنل ہارنے والی ٹیمیں تیسری پوزیشن کے لیے آمنے سامنے ہوں گی۔

ریفری کے فیصلوں کو ٹریک کرنے اور مدد کرنے کے لیے ٹیکنالوجی کے ساتھ متعارف کرائی گئی موجودہ گیند اب تک ورلڈ کپ ٹورنامنٹ کے گروپ مرحلے اور ابتدائی ناک آؤٹ راؤنڈز میں استعمال ہوتی رہی ہے۔

فیفا نے ایک بیان میں کہا کہ الحلم نامی یہ فٹ بال گولڈ بیس ڈیزائن اور تکونی شکل کے ساتھ، میزبان ملک کے دارالحکومت دوحہ کے آس پاس کے صحراؤں کو خراج تحسین پیش کرتی ہے۔

فٹ بال بنانے والی کمپنی ایڈیڈاس کے جنرل مینجر نک کریگس نے ایک بیان میں کہا کہ الحلم دنیا کو ایک ساتھ لانے کے لیے کھیل اور فٹ بال کی طاقت پر روشنی کی کرن کی نمائندگی کرتی ہے۔

نک کریگس نے مزید کہا کہ دنیا بھر کے تقریباً ہر ملک سے لاکھوں لوگ اس کھیل کے لیے اپنے جذبے سے متحد ہو کر آئیں گے اور ہم ٹورنامنٹ کے آخری مراحل میں شامل تمام ٹیموں کے لیے نیک خواہشات کا اظہار کرتے ہیں۔