سانحہ بلدیہ فیکٹری کیس میں عدالت نے سرکار کی اپیل پر ایم کیوایم رہنما رؤف صدیقی کو نوٹس جاری کردیے۔

تفصیلات کے مطابق سندھ ہائی کورٹ میں سانحہ بلدیہ فیکٹری کیس میں زبیرچریا، عبدالرحمان بھولا اور دیگر کی سزاؤں کے خلاف اپیلوں کی سماعت ہوئی۔

سرکاری وکیل نے ایم کیو ایم رہنما رؤف صدیقی کی بریت کے خلاف بھی اپیل دائر کردی جس پر عدالت نے انھیں نوٹس جاری کیے۔

سندھ ہائی کورٹ نے پراسیکیوشن اور وکلا صفائی کو 400 گواہوں کی فہرست مرتب کرنے کا حکم دیتے ہوئے کہا کہ گواہوں کے رول کے لحاظ سے درجہ بندی کرکے فہرست تیار کی جائے۔ جائے وقوعہ پر موجود گواہان، لاشوں کی شناخت کرنے والوں، پوسٹ مارٹم کرنے والے اور دئگر گواہان کی الگ الگ فہرست پیش کی جائے۔

عدالت نے کہا کہ ملزمان کے خلاف شواہد کی تصدیق کرنے والے گواہوں کی بھی الگ فہرست بنائی جائے۔

سندھ ہائی کورٹ نے سماعت 17 جنوری تک ملتوی کردی۔

ایم کیوایم سابق سیکٹرانچارج عبدالرحمن عرف بھولا، زبیرچریا، شاہ رخ اور دیگر اپیل کنندگان میں شامل ہیں جبکہ ایم کیوایم رہنما رؤف صدیقی کو بری کردیا گیا تھا۔

انسداددہشت گردی عدالت نے زبیرچریا کو 264 بار سزا موت کا حکم سنایا تھا۔

عدالت ان فیکٹری کے چار ملازمین کو آگ لگانے میں سہولت کاری کے جرم میں عمر قید کی سزا سنائی تھی۔

فیکٹری ملازمین میں شاہ رخ، فضل احمد، ارشد محمود اور علی محمد شامل ہیں۔

اپیل میں کہا گیا کہ بھتہ مانگنے کا الزام بے بنیاد ہے، ٹرائل کورٹ نے شواہد کا باریک بینی سے جائزہ نہیں لیا، سزا کالعدم قراردیتے ہوئے ٹرائل کورٹ کے فیصلے پرعملدرآمد سے روکا جائے۔

پراسیکیوشن کا کہنا تھا کہ بلدیہ میں علی انٹرپرائز فیکٹری کو کیمیکل چھڑک کا آگ لگادی گئی تھی، واقعے میں 264 خواتین اور فیکٹری کے ملازمین جاں بحق ہوگئے تھے۔