اسلام آباد کے بلدیاتی انتخابات کی تیاری میں اب تک کتنے اخراجات ہو چکے؟ الیکشن کمیشن نے اخراجات کی تفصیل اسلام آباد ہائی کورٹ میں جمع کرا دی۔

تفصیلات کے مطابق اسلام آباد میں بلدیاتی انتخابات سے متعلق کیس میں الیکشن کمیشن نے کل ہوئی میٹنگ پر اپنا تحریری جواب اسلام آباد ہائی کورٹ میں جمع کرا دیا۔

الیکشن کمیشن کی جانب سے جواب میں عدالت عالیہ کو بتایا کہ عدالتی حکم پرالیکشن کمیشن حکام اٹارنی جنرل کے پاس گئے۔ اٹارنی جنرل نے وزیر قانون سے ٹیلی فون پر رابطہ کیا۔ وزیرقانون نے ابتدائی طور پر چھ ماہ میں الیکشن کا کہا۔

جواب میں کہا گیا کہ الیکشن کمیشن نے 120 دن کے اندر انتخابات پر اصرار کیا۔ وزیر قانون نے بعد میں چار ماہ کے اندر انتخابات پر رضا مندی ظاہر کر دی۔ اٹارنی جنرل نے وزارت داخلہ حکام سے بھی رابطہ کیا۔ وزیرداخلہ نے معاملے پر آج دن دو بجے میٹنگ رکھی ہے۔

الیکشن کمیشن کی جانب سے جواب میں کہا گیا کہ وزیرداخلہ کی جانب سے حکام نے جواب سے آگاہ کیا۔ بتایا کہ وزیرِداخلہ اکیلے وعدہ نہیں کرسکتے وفاقی حکومت سے مشاورت ضروری ہے۔

الیکشن کمیشن نے اخراجات کی تفصیل سے متعلق جواب میں عدالت کو بتایا کہ اسلام آباد بلدیاتی انتخابات میں اب تک 5 کروڑ 52 لاکھ 57 ہزار 6 سو 94 روپے خرچ ہو چکے۔ الیکشن کمیشن کو 15 کروڑ 72 لاکھ 48 ہزار 6 سو 94 روپے مختص کیے گئے تھے۔

جواب میں یہ بھی عدالت کو بتایا گیا کہ بیلٹ پیپرزکی پرنٹنگ، الیکشن میٹیریل، اسٹیشنری، پیٹرولیم چارجز پر ادائیگی ہوئی۔

گذشتہ روز سماعت کا احوال

حکومت سے میٹنگ کرکے کل الیکشن کی ٹائم لائن دیں، عدالت کی الیکشن کمیشن کو ہدایت