حسن مرتضیٰ نے کہا ہے کہ پورے پنجاب کا روڈ اسٹرکچر تباہ ہو چکا ہے۔

تفصیلات کے مطابق جنرل سیکرٹری پیپلز پارٹی وسطی پنجاب حسن مرتضیٰ نے میڈیا سے گفتگو کرتے ہوئے کہا کہ پی ٹی آ ئی حکومت کے پونے چار سالہ دور کی کرپشن کی داستانیں زبان زد عام ہیں، تحریک انصاف کے دور میں ریکارڈ کرپشن ہوئی۔

انہوں نے کہا کہ لاہور میں نیا شہر بسانے کے چکر میں کسانوں کی فصلیں تباہ کر دی گئیں، وزیر اعلیٰ پنجاب پرویز الہٰی کا فوکس صرف اپنے اضلاع پر ہے جبکہ عمران خان پارلیمانی نظام ختم کر کے صدارتی نظام نافذ کرانا چاہتے ہیں۔

حسن مرتضیٰ نے یہ بھی کہا کہ عمران خان کے چار سالہ دور میں کبھی مالم جبہ، توشہ خانہ اور کبھی القادر یونیورسٹی کے سکینڈلز سامنے آئے جبکہ پاکستانی تاریخ کی سب سے بڑی کرپشن عمران خان کے دور میں ہوئی ہے،آج بھی روڈا اتھارٹی کاشتکاروں کو زبردستی بےدخل کر رہی ہے۔

جنرل سیکرٹری پیپلز پارٹی وسطی پنجاب حسن مرتضیٰ کا مزید کہنا تھا کہ نیا شہر آباد کرنے کے چکر میں اپنے مالی سہولت کاروں کو نوازا گیا، چار اضلاع میں وزیر اعلیٰ نے اپنی اور اپنے پیاروں کی اولاد پر خصوصی نوازشات کیں جبکہ پورے پنجاب کا روڈ اسٹرکچر تباہ ہو چکا ہے۔

اس موقع پر جنرل سیکرٹری پیپلز پارٹی وسطی پنجاب سید حسن مرتضٰی، پیپلز پارٹی لاہور کے صدر اسلم گل ،ثمینہ گھرکی،مسزشوکت،سونیا خان،جمیل منج،میاں ایوب،فائزہ ملک،چودھری عاطف رفیق،ڈاکٹر خیام حفیظ،آصف ناگرہ،عمران اٹھوال،علامہ یوسف اعوان،ذیشان شامی اوراحسن رضوی سمیت دیگر پارٹی ر ہنما بھی موجود تھے۔