روس کی جانب سے یوکرین کے شہر خیرسون میں کیے گئے تازہ حملے میں 7 افراد ہلاک اور 58 سے زائد زخمی ہوگئے ہیں۔

غیر ملکی خبررساں ادارے کی رپورٹ کے مطابق روس کی جانب سے یوکرین پر حملے کو 10 ماہ گزرچکے ہیں لیکن یہ جنگ اب بھی جاری ہے اور آج یوکرین کا شہر خیرسون ایک بار پھر دھماکوں سے گونج اُٹھا۔

تازہ ترین روسی حملے کے نتیجے میں 7 افراد ہلاک اور 58 سے زائد زخمی ہوئے ہیں جب کہ اس حملے میں کئی رہائشی عمارتیں بھی تباہ ہوئی ہیں۔

یہ بھی پڑھیں؛ روس یوکرین تنازع: عالمی غذائی اور توانائی کا بحران

دوسری جانب یوکرین نے الزام عائد کیا ہے کہ خیرسون شہر کے مرکز پر روسی بمباری کا مقصد یوکرین کو دھمکانا تھا کیوں کہ یہ حملہ کسی عسکری اڈے یا تنصیب پر نہیں کیا گیا بلکہ اس میں عام شری املاک کو نشانہ بنایا گیا ہے۔

یوکرینی صدر ولادی میر زیلنسکی نے حملے کو دہشت گردی قرار دیتے ہوئے کہا کہ جس مقام پر یہ شلینگ کی گئی وہاں کوئی عسکری تنصیب نہیں تھی۔

انہوں نے روسی حملے کی مذمت کرتے ہوئے کہا کہ روسی کارروائی کا مقصد ‘انسانوں کے قتل سے لطف اندوز ہونا ‘ تھا۔

واضح رہے کہ روس نے رواں برس 24 فروری کو یوکرین پر حملہ کر کے خیرسون شہر پر قبضہ کر لیا تھا۔ یہ واحد علاقائی دارالحکومت تھا، جس پر روسی افواج قبضہ کرنے میں کامیاب ہوئیں تھیں تاہم کچھ عرصہ قبل یوکرینی فوج نے یہ شہر روسی قبضے سے آزاد کروا لیا تھا۔

یوکرین کا کہنا ہے کہ نومبر میں روسی افواج کی پسپائی کے بعدروسی فوج اس شہر کو مسلسل شیلنگ کے ذریعے نشانہ بنا رہی ہے۔