سابق وفاقی وزیر فواد چوہدری کا کہنا ہے کہ پی ٹی آئی قیادت نے فیصلہ کیا ہے کہ وزیراعلیٰ پنجاب اعتماد کا ووٹ لیں گے۔

لاہور میں صوبائی وزیر اسلم اقبال کے ہمراہ میڈیا سے گفتگو کرتے ہوئے سابق وفاقی وزیر اطلاعات فواد چوہدری نے کہا کہ وزیر اعلیٰ پنجاب چوہدری پرویز الٰہی کی جانب سے اعتماد کے ووٹ لینے کا عمل مکمل ہونے کے بعد اسمبلی تحلیل کر دی جائے گی۔

فواد چوہدری کا کہنا تھا کہ عمران خان نے آج پنجاب کی سینئر قیادت کا اجلاس طلب کیا تھا جس میں فیصلہ کیا گیا کہ ہم اعتماد کا ووٹ لینے جا رہے ہیں اور ہمارا ایک وفد چوہدری پرویز الٰہی سے ملاقات کرکے ووٹ کی تاریخ طے کرے گا جب کہ ہمارے تمام ارکان اعتماد کا ووٹ چوہدری پرویز الٰہی کو دیں گے۔

یہ بھی پڑھیں؛ پیپلز پارٹی کی جانب سے ارکان کو 5،5 کروڑ کی آفر کی گئی ہے

انہوں نے کہا کہ ہم جب اسمبلی میں جا کر استعفی منظور کروانے کا کہتے ہیں تو اسپیکر بھاگ جاتے ہیں، پاکستان کی تاریخ میں پہلی بار 127 استعفی آئے۔

پی ٹی آئی کے مرکزی رہنما نے کہا کہ عدالت نے فیصلے میں کہا ہے کہ آپ جب چاہیں اعتماد کا ووٹ لے سکتے ہیں، چوہدری شجاعت بزرگ آدمی ہیں ان کا شہباز شریف سے ملاقاتوں کا کوئی فائدہ نہیں ہوگا، فائدہ ہمیں ہی پہنچے گا۔

سابق وفاقی وزیر کا مزید کہنا تھا کہ آج دہشت گردی اسلام آباد تک پہنچ گئی ہے، ہمارے دور میں دہشت گردی نہ ہونے کے برابر رہ گئی تھی، صاف اور شفاف الیکشن کے بغیر ملک میں استحکام ناممکن ہے، موجود حکمرانوں نے عوام کو انتہائی مایوس کیا۔

پی ٹی آئی وفد وزیراعلیٰ پنجاب سے ملاقات کرے گا 

دوسری جانب ذرائع نے بتایا ہے کہ تحریک انصاف کا وفد وزیر اعلیٰ پنجاب سے ملاقات کے لیے ان کی رہائش گاہ جائے گا،  وفد 8 بجے وزیر اعلیٰ سے ملاقات کے لیے ان کی رہائش گاہ جائے گا ۔

ذرائع کا کہنا تھا کہ وفد پرویز الٰہی سے ملاقات میں ایوان میں اعتماد کا ووٹ لینے کے لئے تاریخ طے کریں گا ، تاریخ کے تعین کے بعد اسمبلی اجلاس طلب کیا جائے گا۔