شرجیل انعام میمن نے کہا ہے کہ سندھ حکومت اپنی پانچ سالہ مدت مکمل کرے گی۔

تفصیلات کے مطابق وزیر اطلاعات سندھ شرجیل انعام میمن نے اپنے ایک اہم بیان میں کہا کہ عمران خان کی بلیک میلنگ کے تمام حربے ناکام ہوچکے ہیں، عمران خان کو ایک بار پھر رسوائی کا سامنا کرنا پڑے گا۔

انہوں نے کہا کہ سندھ اور بلوچستان صوبوں کے عوام وقت پر انتخابات چاہتے ہیں،پاکستان کو سیاست کے نام پر انتشار کی نہیں بلکہ وسیع تر اتفاق رائے کی ضرورت ہے۔

شرجیل انعام میمن نے یہ بھی کہا کہ عمران خان کی آئے روز کی ‘وڈیو پریس کلانفرنسیں’ معاشی و سیاسی انتشار پھیلانے کی کوششوں کے سوا کچھ نہیں، سندھ حکومت اپنی پانچ سالہ مدت مکمل کرے گی۔

وزیر اطلاعات سندھ کا کہنا تھا کہ عمران خان کو شوق ہے تو آج ہی پنجاب اور خیبرپختونخوا کی اسمبلیاں توڑ دیں ، انتظار کس بات کا ہے۔

مزید پڑھیں؛ پاکستان ایک پر امن ملک ہے، شرجیل انعام میمن

انہوں نے کہا کہ اسپیکر قومی اسمبلی نے جون میں ہی پی ٹی آئی کے تمام اراکین اسمبلی کو استعفوں کی تصدیق کے لیے نوٹسز جاری کر دیئے تھے لیکن تصدیق کے لیے اسپیکر قومی اسمبلی کے سامنے کوئی بھی ایم این اے پیش نہیں ہوا اور قومی اسمبلی سیکریٹریٹ کی اطلاع کے مطابق کئی ایم این ایز کے دستخط مسٹر رول سے مطابقت نہیں رکھتے۔

وزیر اطلاعات سندھ نے یہ بھی کہا کہ کے پی کے میں پولیس اسٹیشنز پر حملے ہو رہے ہیں ، صوبے کا وزیر اعلیٰ عمران خان کے غیر سیاسی ایڈوینچر پورے کرنے میں مصروف ہے۔

شرجیل انعام میمن کا کہنا تھا کہ عمران خان نے ملک کی معیشت کا بیڑہ غرق کر دیا اور اب جو کچھ بچ گیا ہے اس کو بھی برباد کرنے پر تلے ہوئے ہیں۔

وزیر اطلاعات سندھ شرجیل انعام میمن کا مزید کہنا تھا کہ عمران خان کو ملک اور عوام سے کوئی سروکار نہیں ، یہ شخص ملک میں عدم استحکام اور بے یقینی صورتحال پیدا کرنے کے ایجنڈے پر مامور ہے۔