لاہور بورڈ کے زیر اہتمام میٹرک کے امتحانات یکم اپریل سے جبکہ انٹرمیڈیٹ کے امتحانات 20 مئی سے شروع ہوں گے۔

تفصیلات کے مطابق لاہور بورڈ نے میٹرک اور انٹرمیڈیٹ کے داخلوں اور امتحانات کا حتمی شیڈول جاری کر دیا، امتحانات کے شیڈول کا اعلان آئی بی سی سی کی منظوری سے کیا گیا ہے۔

میٹرک کیلئے امیدوار سنگل فیس کے ساتھ 18 جنوری تک داخلہ بھجوا سکیں گے۔

انٹرمیڈیٹ کیلئے امیدوار سنگل فیس کے ساتھ 7 فروری سے 7 مارچ تک داخلہ بھجوائیں گے۔

مزید پڑھیں؛ سندھ میں میٹرک اور انٹر کے امتحانات 8 اور 22 مئی سے ہونگے

دوسری جانب سندھ میں میٹرک اور انٹرکے امتحانات کی تاریخیں اور پیٹرن تبدیل کردیا گیا ہے، سندھ میں میٹرک اور انٹر کے امتحانات 8 اور 22 مئی سے ہونگے۔

سیکریٹری اسکول ایجوکیشن سندھ غلام اکبر لغاری کی زیر صدارت اسٹیئرنگ کمیٹی کی زیلی کمیٹی کا اجلاس ہوا جس میں فیصلہ کیا گیا کہ سندھ میں آئندہ سال میٹرک کے امتحانات 8 مئی سے ہوں گے جبکہ انٹرمیڈیٹ کے امتحانات کا آغاز22 مئی سے ہوگا۔

اس موقع پر سب کمیٹی نے صوبے میں میٹرک اور انٹر کے امتحانات  کے پیٹرن میں تبدیلی کی منظوری بھی دی۔

نئے پیٹرن کے مطابق نویں دسویں اور گیارہویں و بارہویں جماعتوں میں ایم سی کیوز کا حصہ 40 فیصد سے کم کرکے 20 فیصد کر دیا گیا جبکہ گزشتہ میٹرک اور انٹر کے منعقدہ امتحانات میں ایم سی کیوز کا 40 فیصد حصہ تھا لیکن اب کیے گئے فیصلے کے مطابق مختصر جوابات اور تفصیلی جوابات کو باقی پرچے میں 40/40 فیصد کا حصہ دے دیا گیا۔

اجلاس میں سیکریٹری کالجز احمد بخش ناریجو، چیئرمینز بورڈز کے علاوہ قائم مقام ڈائریکٹر پرائیویٹ انسٹیٹیوشنز سندھ پروفیسر افضال احمد اور پرائیویٹ اسکولز ایسوسی ایشن کے رہنما طارق شاہ بھی شریک ہوئے۔