پاکستان کرکٹ بورڈ کی جانب سے ایک پریس ریلیز میں کہا گیا ہے کہ پی سی بی مینجمنٹ کمیٹی نے پاکستان جونیئر لیگ کو بند کرنے پر رضامندی ظاہر کر دی ہے۔

تفصیلات کے مطابق پی سی بی کی مینجمنٹ کمیٹی نے آج ہونے والے اجلاس میں اہم فیصلے کیے جس میں سرفہرست پاکستان جونئیر لیگ منصوبے کو منسوخ کرنا شامل تھا۔

پی سی بی مینجمنٹ کمیٹی نے اعلیٰ کارکردگی کا مظاہرہ کرنے والے ہر عمر کے نوجوان کھلاڑیوں کے لیے مواقع پیدا کرنے بھی زور دیا۔

نجم سیٹھی کی قیادت میں ہونے والی پی سی بی مینجمنٹ کمیٹی کی اس میٹنگ میں جونیئر سیریز کو گھر اور دور کی بنیاد پر بحال کرنے پر اتفاق کیا گیا۔

کمیٹی نے یہ بھی فیصلہ کیا کہ  پاکستان سپر لیگ کی فرنچائزز کے ساتھ بات چیت کی جائے گی تاکہ ان کی ابھرتی ہوئی کیٹیگریز میں انڈر 19 کھلاڑی کو پلیئنگ لائن اپ میں شامل کیا جا سکے۔

آج نیشنل ہائی پرفارمنس سینٹر میں نجم سیٹھی کی زیر صدارت اجلاس میں پی سی بی مینجمنٹ کمیٹی نے پی سی بی کے آئین 2014 کے مطابق ریجنل اور ڈسٹرکٹ کرکٹ ایسوسی ایشنز اور ڈپارٹمنٹس و سروس آرگنائزیشن کی بحالی پر بھی بحث کی۔

تفصیلی بات چیت کے بعد اعلان کیا گیا کہ ریجنل اور ڈسٹرکٹ کرکٹ ایسوسی ایشنز اور ڈیپارٹمنٹس/سروس آرگنائزیشنز کا موقف بحال ہو گیا ہے۔

اب باقاعدہ طور پر ڈومیسٹک کرکٹ کے ڈھانچے میں شامل کرنے کے لیے ایک اسٹریٹجک پلان تیار کیا جائے گا، جس میں مقررہ وقت پر پی سی بی بورڈ آف گورنرز میں شرکت بھی شامل ہے۔

مینجمنٹ کمیٹی نے پی سی بی کی 12 کمیٹیوں کی تشکیل کی منظوری دی اور اس بات پر اتفاق کیا کہ ان کی تشکیل کا اعلان وقت پر کیا جائے گا۔

پی سی بی کی مینجمنٹ کمیٹی نے ملک بھر میں کرکٹ کے فروغ کے لیے مندرجہ ذیل کمیٹیاں تشکیل دینے کا فیصلہ بھی کیا۔

ان کمیٹیوں میں ڈومیسٹک ری اسٹرکچرنگ کمیٹی، ڈومیسٹک ریسٹوریشن کمیٹی فار ریجن، ڈپارٹمنٹ کرکٹ ریسٹوریشن کمیٹی، این ایچ پی سی ری ماڈلنگ کمیٹی اور ویمن کرکٹ کمیٹی کی ری اسٹرکچرنگ کمیٹی شامل ہیں۔

دیگر کمیٹیوں میں کرکٹ انفراسٹرکچر کمیٹی، آڈٹ کمیٹی، فنانس اینڈ کمرشل افیئرز کمیٹی، ہیومن ریسورس کمیٹی، قانونی امور کمیٹی، قومی سلیکشن کمیٹیاں اور بینیولینٹ فنڈ کمیٹی بنانے کا فیصلہ کیا گیا ہے۔

پی سی بی مینجمنٹ کمیٹی نے تصدیق کی کہ وہ تمام ڈومیسٹک پلیئرز کے معاہدے کو پورا کرے گی، جو اگست 2023 تک ہیں۔

پی سی بی مینجمنٹ کمیٹی نے خواتین کی کرکٹ میں سرمایہ کاری جاری رکھنے کی حکمت عملی کے تحت وومن لیگ شروع کرنے کے لیے اپنے جوش و خروش اور عزم کا اظہار کیا، جس کا نام بدل کر پاکستان ویمن لیگ رکھ دیا گیا ہے۔