ترجمان دفترخارجہ نے کہا ہے کہ غیر ملکی مشن کو فنڈز کی بروقت ادائیگی کیلئے کوشاں ہیں۔

تفصیلات کے مطابق صحافیوں کو ہفتہ وار بریفنگ دیتے ہوئے ترجمان دفترخارجہ ممتاز زہرا بلوچ نے کہا کہ سیلاب زدگان کی بحالی کے حوالے سے آئندہ برس جنوری میں عالمی ڈونرز کانفرنس کا انعقاد کیا جائے گا۔

انہوں نے کہا کہ کانفرنس کی صدارت وزیر اعظم پاکستان اور اقوام متحدہ کے سیکرٹری جنرل مشترکہ طور پر کریں گے جبکہ کانفرنس میں وزیر خارجہ بلاول بھٹو زرداری بھی شریک ہوں گے۔

مزید پڑھیں؛ کشمیر کے حوالے سے سلامتی کونسل کی قراردادوں پر عمل ہونا چاہیے، ترجمان دفترخارجہ

ممتاز زہرا بلوچ کا کہنا تھا کہ کابینہ نے واشنگٹن میں پاکستان کی ملکیت چانسلری کی عمارت کو فروخت کرنے کا فیصلہ کیا ہے جس کے لیے اوپن بلڈنگ کے ذریعہ بولیاں طلب کر کہ فروخت کیا جائے گا۔

ایک سوال کے جواب میں ترجمان دفترخارجہ نے کہا کہ بیرون ممالک مشنز کو تنخواہوں میں التوا کچھ تکنیکی وجوہات کے بنا پر ہوتا ہے، وزارت خزانہ اور خارجہ غیر ملکی مشن کو فنڈز کی بروقت ادائیگی کے لئے کوشاں ہیں۔

‘پاکستانی سفارت خانے اور سفارتی عملے کی حفاظت یقینی بنائے جائیں’

ممتاز زہرا بلوچ نے یہ بھی کہا کہ چمن واقعہ پر پاک افغان حکام رابطے میں ہیں،  ہم چاہتے ہیں پاکستانی سفارت خانے اور سفارتی عملے کی حفاظت یقینی بنائے جائیں۔ پاکستانی اور افغانستان کے حکام مشاورت میں مصروف ہیں جبکہ پاکستانی ناظم الامور تاحال پاکستان میں ہی ہیں جب تک سیکیورٹی کے معاملات پر یقین دہانی نہیں کروائی جاتی وہ پاکستان میں رہیں گے۔

ایک سوال کے جواب میں ترجمان دفترخارجہ ممتاز زہرا بلوچ نے واضح کیا کہ سیکرٹری جنرل او آئی سی حصین براہیم طحہ کے دورہ پاکستان پر بھارتی موقف کو سختی سے مسترد کرتے ہیں، عالمی برداری اور او آئی سی بھارتی بربریت پر آواز اٹھائے جبکہ کشمیر کے حوالے سے سلامتی کونسل کی قراردادوں پر عمل ہونا چاہیے۔