بھارتی کرکٹ بورڈ نے ہوم گراؤنڈ پر ہونے والے آئی سی سی مینز ون ڈے ورلڈ کپ کے لیے اسکواڈ کا اعلان کر دیا ہے

بھارتی نجی نیوز چینل کے ذرائع نے خبر دی ہے کہ بی سی سی آئی نے آئی سی سی مینز ون ڈے ورلڈ کپ کے لیے 20 کھلاڑیوں پر مشتمل ایک ایک پول کو شارٹ لسٹ کیا ہے، لیکن ان کے نام ظاہر نہیں کئے گئے۔

بھارتی چینل کی رپورٹ کے مطابق بی سی سی آئی سر فہرست کھلاڑیوں کو ورلڈ کپ کی تیاریوں کے پیش نظر آئی پی ایل نہ کھیلنے کا بھی کہہ سکتا ہے۔

بھارتی کرکٹ بورڈ چاہتا ہے کہ ون ڈے ورلڈ کپ میں شرکت کرنے والے کھلاڑیوں کی توجہ تقسیم نہ ہو اور وہ اپنی تمام تر توجہ آئی سی سی ایونٹ پر مرکوز رکھیں، اور خود کو انجری سے بچائیں۔

بھارتی میڈیا کے مطابق ممبئی کے ایک سیون اسٹار ہوٹل میں بی سی سی آئی کا ایک جائزہ اجلاس منعقد ہوا جس میں ٹیم کی کارکردگی کا جائزہ لیا گیا۔

بی سی سی آئی کے اس اجلاس میں کوچ راہول ڈریوڈ، کپتان روہت شرما، این سی اے چئیرمین وی وی ایس لکشمن اور سابق چیف سلیکٹر چیتن شرما بھی موجود تھے۔

بھارتی کرکٹ بورڈ کے صدر راجر بنی اس اجلاس میں موجود نہیں تھے لیکن انہوں نے ویڈیو کانفرنس کے ذریعے اجلاس میں شرکت کی۔

واضح رہے کہ بھارتی کرکٹ ٹیم سال 2023 میں 35 ون ڈے میچز کھیلے گی جس کا آغاز 3 میچوں کی ہوم سیریز میں سری لنکا کے خلاف ہو گا۔

اجلاس میں فیصلہ کیا گیا کہ این سی اے کھلاڑیوں پر ورک لوڈ کو کم کرنے کے لیے آئی پی ایل فرنچائزز کے ساتھ مل کر کھلاڑیوں کی فٹنس پر نظر رکھے گا۔

بھارتی میڈیا نے رپورٹس دی ہے کہ بی سی سی آئی کا یہ اجلاس سال 2022 میں بھارتی کرکٹ ٹیم کی کارکردگی کا جائزہ لینے کے لیے بلایا گیا تھا، جس میں ٹیم کی ورلڈ کپ اور ایشیا کپ میں ناکامی کا جائزہ لیا گیا۔