پرویز اشرف نے کہا ہے کہ تارکین وطن پاکستانیوں کی فلاح و بہبود حکومت کی ترجیح ہے۔

تفصیلات کے مطابق قومی اسمبلی کے اسپیکر راجہ پرویز اشرف نے برطانیہ میں قائم ہیومینٹیرین گروپ کے وفد سے ملاقات کے دوران گفتگو کرتے ہوئے کہا کہ ترقی اور خوشحالی پاکستان کا مقدر ہے کیونکہ ہماری قوم موجودہ چیلنجز سے نکلنے کے لیے پرعزم ہے۔

وفد سے خطاب کرتے ہوئے راجہ پرویز اشرف نے کہا کہ سمندر پار پاکستانیوں نے ہمیشہ خود کو پاکستان کا اثاثہ ثابت کیا ہے اور ان کی فلاح و بہبود موجودہ حکومت کی اولین ترجیح ہے۔

قومی اسمبلی کے اسپیکر نے سمندر پار پاکستانیوں کے کردار کو سراہتے ہوئے کہا کہ یہ سمندر پار پاکستانی ہیں جو ہر مشکل وقت میں پاکستان کا ساتھ دینے کے لیے پیش پیش رہتے ہیں۔

پرویز اشرف نے یہ بھی کہا کہ عوام کو دہشت گردی، انتہا پسندی اور مہنگائی کے چیلنجز کا سامنا ہے اور عوامی نمائندے ہونے کے ناطے یہ ذمہ داری سیاستدانوں پر عائد ہوتی ہے کہ وہ اس قوم کو اس دلدل سے نکالیں۔

قومی اسمبلی کے اسپیکر راجہ پرویز اشرف نے مزید کہا کہ سمندر پار پاکستانیوں کو درپیش چیلنجز سے نمٹنا ان کی سب سے بڑی ترجیح ہے کیونکہ آنے والے مہینے میں خصوصی عدالتیں قائم کی جائیں گی جو بیرون ملک مقیم پاکستانیوں کی جائیدادوں کے مسائل کا فیصلہ کرے گی۔

ملاقات میں وفاقی وزیر برائے سمندر پار پاکستانی ساجد حسین طوری بھی موجود تھے۔