اسلام آباد کی مقامی عدالت میں زمین کی خرید و فروخت کے کیس میں راجہ بشارت کے وکیل نے پراسیکیوشن پراعتراضات اٹھا دیے۔

تفصیلات کے مطابق ڈسٹرکٹ اینڈ سیشن کورٹس اسلام آباد میں سابق صوبائی وزیر قانون راجہ بشارت اور دیگر کے خلاف زمین کی خرید وفروخت سے متعلق ‏کیس کی سماعت ہوئی۔

سینئرسول جج نصرمِن اللہ کی عدالت میں راجہ بشارت اہنے وکیل کے ہمراہ پیش ہوئے اور سماعت کے دوران راجہ بشارت کے وکیل نے پراسیکیوشن پر اعتراضات اٹھا دیے۔

وکیل ملزم نے کہا کہ راجہ بشارت کے خلاف22 سال بعد زمین کی لین دین پر مقدمہ کیوں درج کیاگیا۔ خاتون ساجدہ بقائی نے اتنے سال خاموشی کیوں اختیارکی؟

وکیل راجہ بشارت نے اعتراضات میں کہا کہ مدعی مقدمہ ساجدہ بقائی نے نہ کبھی کوئی ثبوت دیا نہ کبھی تفتیش میں شامل ہوئی؟ جب راجہ بشارت کے خلاف مقدمہ درج ہوا تو مدعی مقدمہ ساجدہ بقائی بیرونِ ملک تھیں۔ مدعی مقدمہ ساجدہ بقائی کا مقصد صرف راجہ بشارت سے سیاسی انتقام لینا تھا۔

وکیلِ ملزم نے کہا کہ مقدمے کے گواہان کے مطابق مدعی مقدمہ ساجدہ بقائی نےہمارے سامنے پیسے ادا نہیں کیے۔ مدعی مقدمہ ساجدہ بقائی نہ پیسوں کی ادائیگی ثابت کرسکیں نہ کوئی معاہدہ۔

وکیل راجہ بشارت نے کہا کہ مدعی مقدمہ ساجدہ بقائی تو یہی ثابت نہیں کرپائیں کہ راجہ بشارت نے ان کے ساتھ کوئی فراڈ کیا۔