کرکٹ آسٹریلیا کا افغانستان کے خلاف سیریز سے دستبردار ہونے پر افغانستان کرکٹ بورڈ کا ردعمل سامنے آ گیا ہے۔

تفصیلات کے مطابق کرکٹ آسٹریلیا نے افغانستان میں خواتین کے حقوق کی پامالی پر افغانستان کے ساتھ شیڈول ون ڈے سیریز کھیلنے سے انکار کر دیا تھا۔

کرکٹ آسٹریلیا کے اس فیصلے پر افغانستان کرکٹ بورڈ نے سخت مایوسی کا اظہار کرتے ہوئے اس اعلان کو غیر متوقع اور غیر منصفانہ قرار دیا۔

افغانستان کرکٹ بورڈ کا کہنا ہے کہ کرکٹ آسٹریلیا کے اس فیصلے سے شدید مایوسی ہوئی ہے اور کہا کہ اس معاملے پر آئی سی سی کو باضابطہ خط لکھیں گے۔

واضح رہے کہ کرکٹ آسٹریلیا نے افغانستان کے خلاف متحدہ عرب امارات میں شیڈول تین میچوں کی ون ڈے سیریز کھیلنے سے انکار کر دیا ہے۔

آسٹریلوی کرکٹ ٹیم کو دورہ بھارت کے بعد مارچ میں یو اے ای کے میدانوں پر افغانستان سے ٹکرانا تھا، جو کرکٹ آسٹریلیا نے کابل کی خواتین مخالف پالیسیوں کی وجہ سے موخر کر دی گئی ہے۔

افغانستان کرکٹ بورڈ نے کرکٹ آسٹریلیا کے اس فیصلے پر کہا کہ یہ بدقسمتی ہے کہ اس اقدام سے سیاست کو کھیل میں شامل کرنے کی کوشش کی گئی.

افغانستان کرکٹ بورڈ کا مزید کہنا تھا کہ کرکٹ آسٹریلیا نے دونوں ممالک تعلقات کو اور کھیل کی انٹیگریٹی کو نقصان پہنچایا ہے، جس کے خلاف آئی سی سی کو خط لکھیں گے۔

افغان کرکٹ بورڈ کے مطابق اس فیصلے سے افغانستان میں کھیل پر منفی اثرات مرتب ہوں گے، اور اگر کرکٹ آسٹریلیا نے اپنے فیصلے کو تبدیل نہیں کیا تو مزید کوئی ایکشن لینے پر غور کیا جا رہا ہے۔

افغانستان کرکٹ بورڈ کا کہنا تھا کہ وہ افغان کرکٹرز کی بی بی ایل میں شرکت کے بارے میں بھی از سر نو جائزہ لیں گے.