ایم کیو ایم پاکستان کو ایک کرنے کے مشن کے حوالے سے کل ایک اور اہم بیٹھک ہونے والی ہے جس میں تمام دھڑوں کے یکجا ہونے کا امکان ہے۔

تفصیلات کے مطابق ایم کیو ایم پاکستان کے سربراہ خالد مقبول صدیقی نے ایک بار پھر تمام دھڑوں کو پارٹی میں واپسی کی دعوت دے دی جس کے بعد پی ایس پی اور فاروق ستار گروپ کی کل بہادرآباد مرکز آمد متوقع ہے۔

ذرائع نے بتایا کہ پاک سرزمین پارٹی اور تنظیم بحالی کمیٹی کی قیادت (مصطفیٰ کمال، انیس قائم خانی، فاروق ستار) کارکنان سمیت کل بہادر آباد جائے گی جہاں ایم کیو ایم پاکستان کے مرکز پر رابطہ کمیٹی ان کا استقبال کرے گی۔

یہ بھی پڑھیں؛ ایم کیو ایم اور پی ایس پی کے انضمام کے لیے ملاقاتوں کا سلسلہ تیز

ذرائع کا کہنا تھا کہ مصطفیٰ کمال اور ڈاکٹر فاروق ستار، خالد مقبول صدیقی کے ہمراہ بہادرآباد میں پریس کانفرنس کریں گے جہاں وہ  کارکنان کے ہمراہ ایم کیو ایم پاکستان میں شمولیت کا اعلان کریں گے۔

اس سے قبل کراچی میں انتخابی حلقہ بندیوں کے خلاف ایم کیو ایم پاکستان نے الیکشن کمیشن کے دفتر کے باہر احتجاج کیا۔

الیکشن کمیشن کے دفترکے باہر احتجاجی مظاہرے میں پاک سرزمین پارٹی کے چیئرمین مصطفیٰ کمال اور تنظیم بحالی کمیٹی کے سربراہ  فاروق ستار نے اپنے کارکنان کے ہمراہ شرکت کی۔

اس موقع پر اپنے خطاب میں خالد مقبول صدیقی نے کہا کہ اگر ایم کیو ایم نے الیکشن نہیں لڑا  تو  پھرکراچی میں کوئی الیکشن نہیں ہوگا۔