تبت میں ایک ہائی وے پر برفانی تودہ گرنے سے گاڑیوں میں سوار کم از کم 8 افراد ہلاک ہو گئے ہیں.

برطانوی خبر رساں ادارے کی خبر کے مطابق جنوب مشرقی تبت کے شہر نینگچی کے قریب منگل کی رات برفانی تودہ گرنے سے کم از کم آٹھ افراد ہلاک ہو گئے ہیں۔

ریسکیو کی کوششوں میں شامل ایک مقامی رہائشی نے مقامی میڈیا کو بتایا کہ برفانی تودہ گرنے سے کئی کاریں الٹ گئیں، اور سڑک مکمل طور پر برف سے ڈھک گئی ہے۔

میڈیا رپورٹس کے مطابق یہ واضح نہیں ہے کہ کتنے لوگ لاپتہ ہیں، سیکڑوں ریسکیورز اور 30 بڑی مشینیں جائے وقوعہ کو تلاش کر رہی ہیں۔

یہ حادثہ ایک شاہراہ پر پیش آیا جو مینلنگ کاؤنٹی کے قصبے پائی اور تبت کی میڈوگ کاؤنٹی کو ملاتی ہے، جو مغربی چین میں ایک دور دراز اور بنیادی طور پر بدھ مت کا علاقہ ہے۔

مقامی میڈیا کو ایک متاثرہ خاتون نے بتایا کہ وہ نئے قمری سال کی تقریبات منانے کے لیے گھر سے ائیرپورٹ کی طرف جا رہے تھے کہ یہ حادثہ پیش آ گیا جس کے بعد سے ابھی تک میرا شوہر لاپتہ ہے۔

واضح رہے کہ سطح سمندر سے تقریباً 3,100 میٹر کی اوسط بلندی کے ساتھ، نینگچی ایک مقبول سیاحتی مقام ہے۔

گزشتہ سال اکتوبر میں کوہ پیمائی کی مہم کے دوران شمالی بھارت میں دروپدی کے ڈنڈا پہاڑ پر بھی برفانی تودہ گرنے سے کم از کم 26 افراد ہلاک ہو گئے تھے۔