عدالت نے لال حویلی میں سیل کیے جانے والے سات یونٹس کو ڈی سیل کرنے کی استدعا خارج کردی۔

تفصیلات کے مطابق لاہورہائی کورٹ پنڈی بنچ کے جسٹس مرزا وقاص رؤف نے لال حویلی سے متعلق درخواست نمٹا دی۔

ایڈمنسٹریٹر وقف املاک نے فاضل عدالت کو بتایا لال حویلی کو سیل نہیں کیا گیا اسے متصل پراپرٹی کو سیل کردیا گیا ہے جس کے بعد  عدالت نے لال حویلی میں سیل کئے جانے والے سات یونٹس کو ڈی سیل کرنے کی استدعا خارج کردی۔

جسٹس مرزا وقاص رؤف نے متروکہ وقف املاک کو پندرہ دن میں معاملہ نمٹانے کی ہدایت کردی۔ عدالت نے متروکہ وقف املاک کو شیخ رشید کی دائر کردہ اپیل پر سماعت کیلئے پندرہ دن دیے۔

سماعت کے دوران واضح مؤقف پیش نہ کرنے پرعدالت نے ایڈمنسٹریٹر وقف املاک کی سرزنش کی۔

اس سے قبل سابق وزیرداخلہ شیخ رشید احمد نے متروکہ وقف املاک کے خلاف پٹیشن لاھورہائی کورٹ راولپنڈی بنچ میں دائرکی جسے عدالت نے دن گیارہ بجے سماعت کے لیے مقررکیا۔

پٹیشن میں متروکہ وقف املاک بورڈ کے اقدام کوغیرقانونی انتقامی اور سیاسی قرار دییتے ہوئے مؤقف پیش کیا گیا کہ لال حویلی کے سیل یونٹ ڈی سیل کیے جائیں۔

ادھر لاہورہائی کورٹ راولپنڈی بنچ میں متروکہ وقف املاک کی کاروائی کے خلاف شیخ رشید نے درخواست دائر کی جسے ایک بجے سماعت کے لیے مقرر کیا گیا۔

ایک بجے سماعت کے بعد ہائیکورٹ راولپنڈی بنچ نے ڈپٹی ایڈمنسٹریٹر آصف خان کو تین بجے ریکارڈ سمیت طلب کیا۔

متروکہ وقف املاک بورڈ نے لال حویلی کو علی الصبح سیل کیا تھا۔

لاہورہائی کورٹ راولپنڈی بنچ میں درخواست دائر کرنے کے بعد سربراہ عوامی مسلم لیگ شیخ رشید نے کیا کہا؟