اگر کسی صارف کے اسمارٹ فون میں یہ خطرناک ایپلی کیشن موجود ہے تو وہ فوراً اسے ڈیلیٹ کردے۔

غیر ملکی خبررساں ادارے کی جانب سے حال ہی میں اسمارٹ فون ایپلی کیشن کے حوالے سے ایک رپورٹ پبلش کی گئی ہے جس کے مطابق اگر آپ کے موبائل فون میں مذکورہ ایپ موجود ہے تو یہ موبائل سے آپ کے بینک اکاؤنٹس کی تمام معلومات چوری کرکے آپ کو کنگال کرسکتی ہے۔

رپورٹ میں بتایا گیا کہ ماہرین نے ایک ایسی خطرناک ایپلی کیشن کا پتا لگایا ہے، اگر آپ نے وہ ڈاؤن لوڈ کردی تو اس کا مطلب یہ ہوا آپ نے اپنی پرائیویسی یعنی موبائل کے کوڈز، فنگر پرنٹ اور چہرے کی شناخت سمیت تمام معلومات کسی اور کے حوالے کردی ہوں اور وہ آسانی سے اس کا استعمال کرسکتا ہے۔

یہ بھی پڑھیں؛ وہ بڑی غلطیاں جو اسمارٹ فونز کو برباد کر سکتی ہیں

ماہرین نے اسمارٹ فون رکھنے والے ایسے صارفین جو اس ایپلی کیشن کو پہلے ہی اپنے موبائل میں ڈاؤن لوڈ کرچکے ہیں، ان کو خبردار کیا ہے کہ اگر وہ کسی بھی بڑی مصیبت سے محفوظ رہنا چاہتے ہیں تو فوراً اس ایپ کو ڈیلیٹ کردیں، ورنہ انہیں پچھتاوا ہوگا۔

غیر ملکی ویب سائٹ کی رپورٹ میں بتایا گیا کہ’’ٹو ڈو: ڈے مینیجر‘‘ نامی یہ اپیلی کیشن بنیادی طور پر دن بھر کی مصروفیات کا شیڈول بنانے کے ساتھ ساتھ اہم تقریبات یا پھر نماز کے اوقات کی یاددہانی میں مدد کے لیے بنائی گئی ہے۔

آئی ٹی ماہرین نے خبردار کیا ہے کہ ’’ٹو ڈو: ڈے مینیجر‘‘ نامی ایپ نہ صرف آپ کے اسمارٹ فون پر آنے والے تحریری پیغامات تک رسائی حاصل کرسکتی ہے بلکہ یہ آپ کی بینکنگ کی حساس معلومات بھی چوری کرکے اس کا غلط استعمال کرسکتی ہے۔

ماہرین کا مزید کہنا تھا کہ جب کوئی صارف اس ایپلی کیشن کو انسٹال کرتے ہیں تو یہ آپ سے فون کے ڈیٹا تک رسائی کی درخواست کرتی ہے اور اگر آپ نے یہ اجازت دے دی تو پھر آپ چاہتے ہوئے بھی اس ایپ کو آسانی سے ڈیلیٹ بھی نہیں کرسکتے ہیں۔

دراصل جب آپ اس ایپلی کیشن کو ڈیٹا تک رسائی کی اجازت دیتے ہیں تو وہ یہ آپ کے اسمارٹ فون میں ڈیوائس ایڈمنسٹریٹر کے طور پر شامل ہوجاتی ہے جس کے بعد صارف کے لیے اس کو غیرفعال کرنا زیادہ آسان نہیں رہتا اور آخرکار صارف کو اپنا اسمارٹ فون ری سیٹ کرنا پڑتا ہے۔