کراچی میں بلدیاتی انتخابات کے معاملے پر چیف الیکشن کمشنرنے ممبر سندھ نثار درانی کو فوری کراچی پہنچنے کی ہدایت کردی۔

تفصیلات کے مطابق سندھ میں بلدیاتی انتخابات کے دوسرے مرحلے کے انعقاد کے حوالے سے چیف الیکشن کمشنرسکندر سلطان راجہ کی زیرِ صدارت الیکشن کمیشن آف پاکستان میں اہم اجلاس منعقد ہوا۔

چیف الیکشن کمشنرسکندرسلطان راجہ نے ممبرسندھ نثار درانی کو فوری کراچی پہنچنے کی ہدایت کردی۔ ممبرسندھ نثار درانی اور سیکریٹری الیکشن کمیشن بلدیاتی انتخابات کے دوران مانیٹرنگ کریں گے۔

الیکشن کمیشن کے مطابق بلدیاتی انتخابات کے دوران شکایات کے ازالے کیلئے اسلام آباد میں کنٹرول روم قائم کیا جائے گا۔ کنٹرول رول 14 جنوری صبح 7 بجے سے کام کرنا شروع کردے گا۔

الیکشن کمیشن کا کہنا ہے کہ کنٹرول روم 16 جنوری رات 12 بجے تک مسلسل کام کرے گا، شکایات کی صورت میں کنٹرول روم متعلقہ حکام کو فوری ہدایات جاری کرے گا، صوبائی الیکشن کمشن سندھ میں بھی شکایات کے ازالے کیلئے کنٹرول روم قائم کیا جائے گا۔

دوسری جانب کراچی میں بلدیاتی انتخابات کے معاملے میں سیکریٹری الیکشن کمیشن عمرحمید کراچی میں موجود ہیں۔

الیکشن کمیشن نے سیکریٹری الیکشن کمیشن کو اہم پیغام دیا ہے جس میں سیکریٹری الیکشن کمیشن کو چیف سیکریٹری اورآئی جی سندھ کے سامنے الیکشن کمیشن کا آرڈر رکھنے کی ہدایت کی گئی۔

واضح رہے کہ الیکشن کمیشن نے قراردیا ہے کہ کراچی ڈویژن، حیدر آباد اور دیگر اضلاع میں انتخابات شیڈول کے مطابق 15 جنوری کو ہی ہوں گے۔