سابق وفاقی وزیرداخلہ شیخ رشید نے کہا ہے کہ کسی میں ہمت ہے تو لال حویلی گراؤ، اینٹ سے اینٹ بجا دوں گا۔

تفصیلات کے مطابق سربراہ عوامی مسلم لیگ شیخ رشید نے لاہور ہائی کورٹ راولپنڈی بنچ کے باہرمیڈیا سے گفتگو کرتے ہوئے کہا کہ میرے خلاف کرپشن کے کوئی ثبوت نہیں ملے۔ کچھ نہ ملا تو میرے خلاف لال حویلی کا کیس بنا دیا۔

انھوں نے کہا کہ یہ لوگ مجھے رات میں گرفتار کرنے کا سوچ رہے ہیں۔ گرفتار کرنا ہے تو ایک فون کال پرمیں آ جاؤں گا۔ لال حویلی پر چالیس سال سے موجود سیکیورٹی ہٹائی گئی۔ ایف سی، رینجرز کے انکار کے بعد ایف آئی اے کو لایا گیا۔

سابق وفاقی وزیرداخلہ نے کہا کہ ہائی کورٹ نے ایف آئی اے سے کہا کہ لال حویلی کیوں جاتے ہیں۔ ایف آئی اے لال حویلی آئی تو آئنی راستہ اختیار کریں گے۔ لال حویلی دن کے اجالے میں آئیں اگر کوئی نقصان ہوا تو ذمے دار یہ خود ہوں گے۔ میں کال دوں گا، دھرنے پر بیٹھ جاؤں گا۔ ہائی کورٹ سے پوری امید ہے انشااللہ انصاف ملے گا۔

شیخ رشید نے کہا کہ یہ بے وقوف ہیں جو آٹا مہنگا کر کے لوگوں کو مارنا چاہتے ہیں، مریم نواز کے آنے پر پٹرول 35 روپے مہنگا کر کے سلامی دی گئی۔

انھوں نے کہا کہ میری 16 وزارتوں کی انویسٹی گیشن کی گئی کہا گیا تمہاری چارنہیں تین مرلے کی جگہ ہے۔ عمر کے اس حصے میں مجھے تنگ نہ کیا جائے۔ آصف نامی رانا ثنااللہ کا فرنٹ مین ہے۔ لال حویلی کے لیت سپریم کورٹ تک جائیں گے۔

سابق وفاقی وزیرداخلہ کا کہنا تھا کہ میں عمران خان کے ساتھ کھڑا ہوں اس لیے انھیں تکلیف ہے،عمران خان آنے والا وزیراعظم ہے۔

شیخ رشید نے مذید کہا کہ لال حویلی یونیورسٹی کو وقف کر چکا ہوں۔ لندن میں تین کمپنیاں لال حویلی پر فلم بنانا چاہتی ہیں مجھے فلم بنانے کے اچھے پیسے مل رہے ہیں۔

شیخ رشید احمد کی درخواست دائر

میڈیا سے گفتگو سے قبل سابق وزیرداخلہ شیخ رشید احمد نے متروکہ وقف املاک کے خلاف لاہورہائی کورٹ راولپنڈی بنچ میں پٹیشن دائر کردی۔

شیخ رشید احمد اپنے وکیل سردار عبدالرازق کے ہمراہ پیش ہوں گے۔

پٹیشن میں مؤقف اپنایا گیا کہ متروکہ وقف املاک بورڈ کا اقدام کوغیر قانونی انتقامی اورسیاسی قرار دیا گیا۔ لال حویلی کے سیل یونٹ ڈی سیل کیے جائیں۔