سابق چئیرمین رمیز راجہ نے پی سی بی کی مینجمنٹ کمیٹی کا پاکستان جونیئر لیگ ختم کرنے پر کہا کہ اسے انتقامی سیاست کا نشانہ بنایا گیا۔

تفصیلات کے مطابق نجم سیٹھی کی زیر صدارت پی سی بی کی مینجمنٹ کمیٹی نے گزشتہ روز ایک اجلاس میں پاکستان جونئیر لیگ کو ختم کرنے کا فیصلہ کیا تھا۔

پاکستان جونئیر لیگ پی سی بی کے سابق چئیرمین رمیز راجہ کے دور میں شروع کی گئی تھی جس کا پہلا ایڈیشن گزشتہ سال کھیلا گیا تھا۔

واضح رہے کہ گزشتہ روز پی سی بی کی مینجمنٹ کمیٹی نے ریجنل، ڈسٹرکٹ اور ڈپارٹمنٹل کرکٹ کو بحال کیا تھے اور پاکستان جونئیر لیگ کو ختم کر کے نوجوان کھلاڑیوں کے لیے نئے مواقع تلاش کرنے کا فیصلہ کیا گیا تھا۔

رمیز راجہ نے اپنے دور میں شروع کی جانے والی جونئیر لیگ کی منسوخی کے خلاف آواز اٹھانا شروع کر دی ہے انہوں نے سماجی رابطے کی ویب سائٹ ٹوئٹر پر ایک پوسٹ بھی کی۔

سابق چئیرمین رمیز راجہ نے اپنے ٹوئٹ میں امریکہ کے لیجنڈ سابق باسکٹ بال کھلاڑی میجک جانسن کے الفاظ شیئر کیے کہ،’تمام بچوں کو ذرا سی مدد اور امید کی ضرورت ہوتی ہے، ساتھ ہی انہیں کسی ایسے شخص کی ضرورت ہوتی ہے جو ان پر بھروسہ کرے‘۔

رمیز راجہ نے لکھا کہ پاکستان جونیئر لیگ کو انتقامی سیاست کا نشانہ بناتے ہوئے ختم کر دیا گیا ہے جو افسوس کی بات ہے۔

سابق چیئرمین نے لکھا کہ پاکستان جونیئر لیگ کے 7 بچوں نے پی ایس ایل 8 کی ایمرجنگ کیٹیگری میں جگہ حاصل کی، جن میں سے 3 کھلاڑی پاکستان اور نیوزی لینڈ ٹیسٹ سیریز کے ریزرو کھلاڑی بھی ہیں۔