احسن اقبال نے کہا ہے کہ معاشی بحران سے نکلنے کے لیے جامع اصلاحات کرنا ہونگی۔

تفصیلات کے مطابق ن لیگ کے رہنما احسن اقبال نے نورکوٹ میں میڈیا سے گفتگو کرتے ہوئے کہا کہ ٹیکنوکریٹ حکومت کامیاب نہیں ہوسکتی۔

احسن اقبال نے کہا کہ9 سال مشرف نے بھی ٹیکنوکریٹس کے سہارے حکومت کی تھی ، ٹیکنوکریٹس حکومت کے معاونین ہوسکتے ہیں لیکن حکمران نہیں۔

انہوں نے کہا کہ کچھ لوگ ٹیکنوکریٹس حکومت کا شوشہ چھوڑ رہے ہیں ، کچھ ٹیکنوکریٹس ہر دور میں وزیر مشیر بنے کے لئے تیار رہتے ہیں۔

ن لیگ کے رہنما نے یہ بھی کہا کہ معاشی اصلاحات کے لئے سیاسی حکومت سپورٹ ضروری ہوتی ہے، معاشی بحران سے نکلنے کے لیے جامع اصلاحات کرنا ہونگی۔

یہ بھی پڑھیں؛ پاکستان معاشی سرگرمیوں کا مرکز بن سکتا ہے، احسن اقبال

ان کا کہنا تھا کہ معیشت بچانے کے لیے عمران دور کے مالیاتی معاہدوں پر عملدرآمد کرنا مجبوری ہے، یوریا کی ذخیرہ اندوزی کے باعث پنجاب کے کاشتکاروں کو شدید مشکلات کا سامنا ہے۔

احسن اقبال کا یہ بھی کہنا تھا کہ کھاد کی عدم دستیابی کی ذمہ دار،  پنجاب حکومت ہے جو سپریم کورٹ کے حکم پر قائم ہے، یوریا کی قلت کا سپریم کورٹ نوٹس لے۔

انہوں نے کہا کہ پچھلی حکومت ملک میں تباہی اور ڈی ویلیویشن کی بنیاد رکھ کر گئی، ملکی معیشت کی بحالی کے لیے برآمدات میں اضافے کی ضرورت ہے۔

ن لیگ کے رہنما احسن اقبال نے مزید کہا کہ دوست ممالک بھی ہماری معیشت کے استحکام میں مدد کر رہے ہیں۔