متحدہ عرب امارات اور چین نے اسرائیلی وزیر کے دورہ مسجد القصیٰ پر اقوام متحدہ سے فوری اجلاس بلانے کا مطالبہ کر دیا ہے۔

غیر ملکی خبروں کے مطابق متحدہ مسجد اقصیٰ کے احاطے میں اسرائیل کے انتہائی دائیں بازو کے قومی سلامتی کے وزیر بن گوئیر کے داخل ہونے پر متحدہ عرب امارات اور چین نے اقوام متحدہ کا اجلاس بلانے کا مطالبہ کر دیا ہے۔

سفارت کاروں نے گزشتہ رات دیر گئے ایک غیر ملکی نیوز ایجنسی کو بتایا کہ جمعرات کو اقوام متحدہ کی سلامتی کونسل کا اجلاس متوقع ہے۔

واضح رہے کہ اسرائیلی وزیر بین گویر کے اقدام کی دنیا بھر میں شدید مذمت کی گئی، مصر، اردن، سعودی عرب، ترکی اور متحدہ عرب امارات اس کی مذمت میں فلسطینیوں کے ساتھ شامل ہوئے۔

فلسطینی کی قیادت نے اسرائیلی وزیر کی اس دراندازی کو بے مثال اشتعال انگیزی قرار دیا۔

یاد رہے کہ اسرائیلی وزیر بین گویر نے مسجد اقصیٰ کے جس حصے کا دورہ کیا تھا وہ مسلمانوں کے لیے مختص ہے اور اسرائیل اور فلسطین کے ایک معاہدے کے تحت اس حصے میں اسرائیلیوں کا داخلہ ممنوع ہے۔

فلسطینی وزارت خارجہ نے کہا کہ وہ انتہا پسند وزیر بن گویر کی طرف سے مسجد اقصیٰ پر حملے کی شدید مذمت کرتی ہے اور اسے ایک غیر معمولی اشتعال انگیزی اور تنازع میں خطرناک اضافے کے طور پر دیکھتی ہے.

دریں اثناء، فلسطینی وزیر اعظم محمد شطیہ نے بین گویر پر الزام لگایا کہ اس نے یہ دورہ مزار کو یہودی معبد میں تبدیل کرنے کی کوشش کے ایک حصے کے طور پر کیا، جو اسرائیل کے انتہائی دائیں بازو کے لوگوں کا ہدف ہے۔

حماس، جو کہ محصور غزہ کی پٹی پر حکومت کرتا ہے، نے خبردار کیا ہے کہ بین گویر کا یہ اقدام ایک ’سرخ لکیر‘ کو عبور کرنے کے مترادف ہے۔