لاہور کی احتساب عدالت نے وزیراعظم شہبازشریف اور حمزہ شہباز کیخلاف منی لانڈرنگ کیس کی سماعت 27 جنوری تک ملتوی کر دی۔

تفصیلات کے مطابق لاہورکی احتساب عدالت نمبر 9 کے جج قمرالزمان نے کیس پر سماعت کرتے ہوئے حمزہ شہباز کی حاضری معافی کی درخواست منظورکرلی۔

احتساب عدالت نے وزیراعظم شہبازشریف کو حاضری سے مستقل استثنی دے رکھا ہے۔ اُن کے متبادل انوار حسین ایڈووکیٹ عدالت میں پیش ہوئے جبکہ سلیمان شہبازبھی عدالت میں پیش ہوئے۔

عدالت نے استفسارکیا کہ کیا ابھی سلیمان شہباز کی عبوری ضمانت چل رہی ہے؟ ٹرائل میں سلیمان شہباز کی حاضری ضروری نہیں ان کا الگ ریفرنس فائل ہوگا۔ سلیمان شہباز صرف عبوری ضمانت ابھی حاضری لگوائیں۔

نیب کے ریفرنس میں کہا گیا کہ ریفرنس میں شہبازشریف، حمزہ شہباز سمیت ٹوٹل 16 ملزمان کو نامزد کیا گیا ہے۔ نیب ریفرنس میں شہباز شریف ،سلیمان شہباز، حمزہ شہباز، رابعہ شہباز، نصرت شہباز کو فریق بنایا گیا ہے۔

وزیراعظم کے داماد کی عبوری ضمانت میں توسیع

دوسری جانب لاہورکی احتساب عدالت نے وزیراعظم پاکستان کے داماد ہارون یوسف کی عبوری ضمانت میں 23 جنوری تک توسیع کردی۔

نیب نے جواب جمع کرانے کیلئے مہلت طلب کی۔

احتساب عدالت نمبر9 کے جج الزمان نے ہارون یوسف کی ضمانت قبل از گرفتاری درخواست پر سماعت کی۔ ہارون یوسف حاضری کیلئے عدالت کے روبرو پیش ہوئے اور درخواست میں مؤقف پیش کیا کہ شامل تفتیش ہوکر نیب حکام کو حقائق سے آگاہ کرنا چاہتا ہوں۔

ہارون یوسف نے درخواست میں استدعا کی کہ نیب نے حقائق چھپا کر اشتہاری قراردلوایا، ٹرائل کے حتمی فیصلے تک ضمانت منظور کی جائے۔

اس سے قبل ہارون یوسف منی لانڈرنگ کے مقدمے میں اشتہاری تھے۔