جوڈیشل مجسٹریٹ وقاص احمدراجہ نے کہا کہ ساڑھے گیارہ بجے کے آس پاس فواد چودھری اسلام آباد پہنچیں گے۔ پراسیکیوشن فواد چودھری کے پہنچنے کے بعد بتا دیں گے کہ کب پیش کرنا ہے۔ پراسیکیوشن کہہ رہی کہ سڑکیں بند ہیں۔

جج نے ریمارکس دیے کہ فواد چوہدری کا تو شاید رات کو میڈیکل ہو چکا ہے، لیکن رپورٹ ابھی تک آئی نہیں۔

سماعت کے دوران جج نے نیب کورٹ کو تفتیشی افسرسے رابطہ کرنے کی ہدایت کرتے ہوئے کہا کہ تفتیشی افسر سے رابطہ کرکے پوچھیں کہ فواد چودھری کو کب عدالت پیش کرنا ہے۔

وکیل بابر اعوان نے کہا کہ ساڑھے بارہ کے آس پاس کا وقت بتا دیں۔ جب کہ وکیل علی بخاری نے کہا کہ اگر ایک بجے بھی پیش کرنا ہے تو بتا دیں لیکن ٹھیک وقت بتادیں۔

بابر اعوان نے کہا کہ پراسیکیوشن کو ضمیرکا قیدی بنایا ہوا ہے۔ استدعا ہے کہ پراسیکیوشن کو ضمیر جگانے کی ہدایت کی جائے جس پر جج نے ریمارکس دیے کہ عدالتی عملہ فواد چودھری کو عدالت پیش کرنے کے حوالے سے پی ٹی آئی وکلاء کو آگاہ کرےگا۔

جوڈیشل مجسٹریٹ وقاص احمدراجہ نے ڈی ایس پی لیگل کو فواد چوہدری کو پیش کرنے کا وقت بتانے کی ہدایت کردی، ڈی ایس پی لیگل عدالت میں پیش ہوئے اور بتایا کہ فواد چوہدری کو 3 بجے پیش کیا جائے گا۔ فواد چوہدری کوعدالتی اوقات کے اندرہی پیش کریں گے۔

جج نے استفسار کیا کہ کوئی ایک وقت بتا دیں تاکہ دیگرکیسز میں خلل نہ پیدا ہو جس پر ڈی ایس پی لیگل نے جواب دیا کہ فواد چوہدری کا فوٹوگرامیڑک ٹیسٹ کروا لیا ہے، میڈیکل کروانا ہے۔ جس کے بعد عدالت نے فوادچودھری کیس کی سماعت میں وقفہ کردیا۔

جوڈیشل مجسٹریٹ وقاص احمدراجہ کی عدالت میں وکیل ڈاکٹر بابراعوان، سینیٹرشہزاد وسیم ، غلام سرور خان، فواد چوہدری کے وکیل علی بخاری، فواد چوہدری کے بھائی فیصل چوہدری، فراز چوہدری کے علاوہ مرتضی طوری ایڈووکیٹ اور دیگر وکلاء کمرہ عدالت میں موجود تھے۔