ڈینگی ڈیوائس کی خریداری میں خورد برد سے متعلق پولی کلینک کرپشن کیس کے ملزمان ڈاکٹر امان اللہ اور اسٹور کیپر عابد حسین کے 3 روزہ جسمانی ریمانڈ کی استدعا منظورکرلی گئی۔

تفصیلات کے مطابق ڈسٹرکٹ اینڈ سیشن کورٹ اسلام آباد جوڈیشل مجسٹریٹ عمرشبیر نے ڈینگی ڈیوائس کی خریداری میں خورد برد سے متعلق پولی کلینک کرپشن کیس کی سماعت کی۔

گرفتار دو ملزمان کو جسمانی ریمانڈ کے لیے سیشن عدالت پیش کیا گیا، ملزمان ڈاکٹرامان اللہ کے وکیل قاضی ریحان جبکہ اسٹور کیپر کی جانب سے چوہدری سہیل عدالت میں پیش ہوئے۔

عدالت نے آئی او سے استفسار کیا، ڈاکٹر امان اللہ نے کیا کیا ہے؟؟آئی او نے عدالت کو بتایا کہ ڈاکٹرامان نے ای ڈی کو معاملہ بیجھنا تھا لیکن انھوں نے اسٹور کیپر کو معاملہ بھج دیا۔

عابد حسین کے وکیل سہیل چوہدری نے دلائل میں بتایا کہ پہلے یہ دیکھنا ہوگا کہ یہ کیس ایف آئی اے کی دائرہ کار میں آتا ہے کہ نہیں، پورے کیس میں صرف دو بندے ملے ہیں ایک اوپر بیٹھا ہوا اور ایک سب سے نیچے۔ پوری انکوائری میں صرف ان دونوں کو رکھا گیا دیگر کسی کو بھی نہیں۔

ڈاکٹر امان اللہ کے وکیل قاضی ریحان نے دلائل دئیے کہ ڈاکٹر امان اللہ نے صرف اپنے دستخط کیے اور لیٹر آگے بھج دیا، میں ڈپٹی ایگزیکٹو ڈائریکٹر ہوں میرے سے اوپر ایگزیکٹو ڈائریکٹر موجود ہیں جن نے تمام معاملات دیکھنے ہیں، لیٹروینڈراسٹور کیپر کو دیتا ہے اور وہ ڈاکٹر رابعہ کو دیا جنھوں نے مجھے بھج دیا، میں نے یہ کہا کہ خط پراپر چینل کے ذریعے بھج دیں۔

عدالت نے دلائل ختم ہونے کے بعد فیصلہ محفوظ کرلیا۔ بعد ازاں عدالت نے ملزمان ڈاکٹر امان اللہ اور اسٹور کیپر عابد حسین کو 3 روزہ جسمانی ریمانڈ پر ایف آئی اے کے حوالے کردیا۔