قطر فیفا ورلڈ کپ میں مراکش کی جانب سے اپنی صلاحیتوں کا لوہا منوانے والے اشرف حکیمی کو عرب کا بہترین ایتھلیٹ قرار دے دیا گیا۔

غیر ملکی خبر رساں ادارے کی خبر کے مطابق فیفا ورلڈ کپ میں اپنے شاندار کھیل سے مشہور ہونے والے مراکش کے اسٹرائیکر اشرف حکیمی کو عرب کے بہترین ایتھلیٹ کے اعزاز سے نوازا گیا ہے۔

سعودی عرب کے دارالحکومت ریاض میں جوائے ایوارڈ 2022 کی منعقدہ تقریب میں اشرف حکیمی کو بہترین ایتھلیٹ منتخب کیا گیا، انہون نے یہ ایوارڈ اپنی والدہ کی موجودگی میں وصول کیا۔

واضح رہے کہ جوائے ایوارڈز 2022 کی تقریب عرب ممالک میں سب سے بڑی تقریب کہلاتی ہے جس میں زندگی کے مختلف شعبوں میں نمایاں کارکردگی کا مظاہرہ کرنے والوں کی خدمات کو سراہا جاتا ہے۔

مراکش کے اشرف حکیمی نے ایوارڈ لینے کے بعد اپنے تاثرات بیان کرتے ہوئے کہا کہ سعودی عرب جیسے خاص ملک میں اپنی والدہ کے ہمراہ آنا بہت بڑے اعزاز کی بات ہے۔

اشرف حکیمی نے بہترین ایتھلیٹ کا ایوارڈ دینے پر مراکش کی عوام اور عرب ممالک کا بھی شکریہ ادا کیا۔

یاد رہے کہ دو ماہ قبل قطر میں ہونے والے فیفا ورلڈ کپ میں مراکش کی ٹیم نے شاندار کارکردگی کا مظاہرہ کرتے ہوئے سیمی فائنل تک رسائی حاصل کی تھی۔

مراکش نے فیفا ورلڈ کپ 2022 میں پرتگال، اسپین اور بیلجئیم کی مضبوط ٹیموں کو شکست دی تھی اور پہلی مسلم ٹیم بنی جس نے ایونٹ کی تاریخ میں سیمی فائنل کھیلا۔