وزیراعظم شہباز شریف اور آرمی چیف جنرل عاصم منیر پشاور پہنچ گئے جہاں انہوں نے سیکیورٹی اداروں کا ہنگامی اجلاس طلب کرلیا۔

تفصیلات کے مطابق وزیراعظم شہباز شریف نے لیڈی ریڈنگ اسپتال کا دورہ کیا، آرمی چیف جنرل عاصم منیر کے علاوہ وزیر داخلہ رانا ثنااللہ، وزیراطلاعات مریم اورنگزیب کے ہمراہ دیگر بھی ان کے ساتھ موجود تھے۔ وزیراعظم اور آرمی چیف نے زخمیوں کی عیادت کی۔

وفاقی وزیر اطلاعات مریم اورنگ زیب نے بتایا کہ وزیراعظم شہباز شریف پشاور پہنچ گئے جہاں انہوں ںے سانحہ پشاور کے افسوس ناک واقعہ کے بعد ہنگامی اجلاس اور تمام متعلقہ اداروں کے حکام کو طلب کر لیا ہے۔

یہ بھی پڑھیں؛ پشاور دھماکے کے شہداء کی فہرست

وزیر اطلاعات کا کہنا تھا کہ امن وامان سے متعلق وزیراعظم کی زیر صدارت اجلاس میں افسوسناک واقعے کے محرکات پر غور کیا جائے گا اور واقعے پر ابتدائی تحقیقاتی رپورٹ پیش کی جائے گی۔

پاکستان کیخلاف جنگ کرنے والوں کو صفحہ ہستی سے مٹا دیں گے

اس سے قبل وزیراعظم نے پشاور دھماکے کی مذمت کرتے ہوئے کہا کہ اللہ تعالی کے حضور سربسجود مسلمانوں کا بہیمانہ قتل قرآنی تعلیمات کے منافی ہے، اللہ کے گھر کو نشانہ بنانا ثبوت ہے کہ حملہ آوروں کا اسلام سے کوئی تعلق نہیں۔ دہشت گرد پاکستان کے دفاع کا فرض نبھانے والوں کو نشانہ بنا کر خوف پیدا کرنا چاہتے ہیں۔

وزیراعظم کا کہنا تھا کہ پاکستان کے خلاف جنگ کرنے والوں کو صفحہ ہستی سے مٹا دیں گے، خیبرپختونخوا میں امن وامان کی بگڑتی صورت حال پر جامع حکمت عملی اپنائیں گے۔ وفاق صوبوں کی انسداد دہشت گردی کی صلاحیت بڑھانے میں تعاون کرے گا۔

واضح رہے کہ پشاور کی  پولیس لائنز کی مسجد میں خودکش دھماکے میں شہید ہونے والوں کی تعداد 44 ہوگئی ہے جب کہ 157 افراد زخمی ہیں۔