بھارت نے ون ڈے کرکٹ کی تاریخ میں نیا ریکارڈ بناتے ہوئے سری لنکا کو 317 رنز کے بھاری مارجن سے شکست دے دی۔

تفصیلات کے مطابق بھارت اور سری لنکا کے درمیان جاری ون ڈے سیریز کے آخری میچ میں بھارت کے 390 رنز کے جواب میں سری لنکا کی ٹیم 73 رنز پر ڈھیر ہو گئی۔

یہ ون ڈے کرکٹ کی تاریخ میں کسی بھی ٹیم کی سب سے بڑی جیت ہے۔

میچ میں پہلے کھیلتے ہوئے بھارت نے 5 وکٹ پر 390 رنز کا بڑا اسکور بنایا، ویرات کوہلی اور شبھمن گل نے سنچری بنائی، جواب میں سری لنکا کی ٹیم 22 اوورز میں 73 رنز پر ڈھیر ہوگئی۔

بھارتی بیٹسمین بھنڈارا نے چوٹ کی وجہ سے بلے بازی نہیں کی۔ تیز گیند باز محمد سراج نے شاندار بولنگ کرتے ہوئے 32 رنز کے عوض 4 وکٹیں حاصل کیں۔

اس تاریخ ساز کامیابی کے ساتھ بھارتی ٹیم نے ون ڈے سیریز میں 3-0 سے کلین سویپ کیا۔

سری لنکا کی ٹیم کبھی بھی بھارت کو ون ڈے سیریز میں اس کے ہوم گراؤنڈ پر ہرانے میں کامیاب نہیں ہو سکی ہے ۔

اس سے پہلے بڑی جیت کا ریکارڈ نیوزی لینڈ کے نام تھا جو انہوں نے 2008 میں آئرلینڈ کو 290 رنز سے شکست دے کر بنایا تھا۔

ہدف کا تعاقب کرنے کیلئے اتری سری لنکا کی ٹیم ابتداء میں ہی مشکلات کا شکار ہو گئی جب ان کی 5 وکٹیں صرف 37 رنز پر گر گئیں۔

اس کے بعد کپتان داسن شناکا سے توقع کی جارہی تھی، لیکن بھی وہ صرف 11 رنز بناکر بائیں ہاتھ کے اسپنر کلدیپ یادو کا شکار بن گئے۔

سری لنکا کے 7 بلے باز دوہرے ہندسے میں بھی نہیں پہنچ سکے، محمد سراج کے علاوہ محمد سمیع اور کلدیپ یادو نے بھی 2-2 وکٹیں حاصل کیں۔

اس سے پہلے بھارت کی ون ڈے میں سب سے بڑی جیت 257 رنز کی تھی جب مارچ 2007 میں بھارت نے برمودا کو ورلڈ کپ کے ایک میچ میں 257 رنز سے شکست دی تھی، یہ میچ ویسٹ انڈیز میں کھیلا گیا تھا۔

اس میچ میں بھارتی ٹیم نے پہلے کھیلتے ہوئے 5 وکٹ پر 413 رنز بنائے تھے۔ وریندر سہواگ نے سنچری بنائی تھی۔

جواب میں برمودا کی پوری ٹیم 156 رنز بنا کر پویلین لوٹ گئی تھی۔ اس کے علاوہ 2008 میں بھارت نے کراچی میں ہانگ کانگ کے خلاف 256 رنز سے بڑی جیت حاصل کی تھی ۔