چند روز قبل کار حادثے میں زخمی ہونے والے بھارتی وکٹ کیپر بیٹسمین رشبھ پنت کو مزید علاج کے لیے ممبئی منتقل کرنے کا فیصلہ کیا گیا ہے۔

تفصیلات کے مطابق بھارتی وکٹ کیپر بلے باز رشبھ پنت حال ہی میں ایک کار حادثے میں بال بال بچ گئے اور انہیں دہرادون کے ایک اسپتال میں داخل کرایا گیا تھا۔

وکٹ کیپر بیٹسمین رشبھ پنت کو اب ان کی چوٹوں کے مزید علاج کے لیے ممبئی منتقل کیا جائے گا۔

دہلی اور ڈسٹرکٹ کرکٹ ایسوسی کے ڈائریکٹر شیام شرما کے مطابق پنت کو دہرادون کے میکس اسپتال سے ممبئی منتقل کیا جائے گا جہاں زخمی کرکٹر اس وقت زیر نگرانی ہے۔

شیام شرما نے میڈیا کو مزید بتایا کہ کرکٹر رشبھ پنت کو مزید علاج کے لیے آج ممبئی منتقل کیا جائے گا۔

زخمی کرکٹر ممبئی میں بی سی سی آئی کے ڈاکٹروں کی نگرانی میں ہوں گے۔

کار کے خوفناک حادثے میں رشبھ پنت کی کمر، پاؤں اور آنکھوں کے قریب زخم آئے تھے۔ تاہم وہ جان لیوا زخموں سے بچنے میں کامیاب رہے۔

کار حادثے میں رشبھ پنت کے دائیں گھٹنے میں لگامینٹ پھٹ گیا جس کی وجہ سے امکان ہے کہ وہ 2023 کے وسط تک کرکٹ سے باہر ہو جائیں گے

شیام شرما کے مطابق رشبھ پنت کی حالت پہلے سے بہتر ہے اور علاج کے لیے اچھا جواب دے رہے ہیں۔ ان کی بائیں بھنویں کی پلاسٹک سرجری ہوئی جو حادثے میں پھٹ گئی تھی۔

شیام شرما نے مزید کہا کہ جہاں تک ان کے دائیں گھٹنے میں لگیمنٹ کی چوٹ کا تعلق ہے، انہیں ٹھیک ہونے میں کچھ وقت لگے گا.