وزیرِ اعظم شہباز شریف نے کہا ہے کہ توانائی کی بچت قومی فریضہ ہے اور ہمیں اس پر عمل درآمد یقینی بنانا ہے۔

تفصیلات کے مطابق وزیرِ اعظم شہباز شریف کی زیر صدارت ملک میں توانائی کی بچت کیلئے اقدامات پر عملدرآمد کے حوالے سے جائزہ ہوا جس میں وزیراعظم نے مقامی سطح پر سولر پینلز بنانے کے لیے پالیسی کو ترجیحی بنیادوں پر حتمی شکل دینے کی ہدایت دی۔

اجلاس میں شہباز شریف کو سولرآئیزیشن منصونے پر عملدرآمد پر پیشرفت سے آگاہ کرتے ہوئے بتایا گیا کہ ابتدائی مرحلے میں وفاقی سرکاری عمارتوں میں مجموعی طور پر 1000 میگاواٹ کے سولر پینل لگائے جائیں گے۔

یہ بھی پڑھیں؛ دہشت گردی کے خاتمے کے لئے کوئی کسر اٹھا نہیں رکھیں گے، شہباز شریف

وزیرِ اعظم شہباز شریف نے موسم گرما سے قبل سرکاری عمارتوں میں ایک ہزار میگاواٹ شمسی توانائی کا منصوبہ مکمل کرنے کی ہدایت دی جبکہ وزیراعظم نے رواں سال کے اختتام تک ملک میں صرف ای بائیکس کی پیداوار یقینی بنانے کے لیے اقدامات کی بھی ہدایت دی۔

شہباز شریف نے کہا کہ توانائی کی بچت قومی فریضہ ہے اور ہمیں اس پر عمل درآمد یقینی بنانا ہے،10 ہزار میگاواٹ شمسی توانائی کے منصوبوں پر عملدرآمد میں کسی قسم کا تعطل یا غفلت قبول نہیں کیا جائے گا۔

وزیرِ اعظم شہباز شریف نے ہدایت کی کہ رواں سال کے اختتام پر ملک میں صرف الیکٹرانک موٹر سائیکلوں کی پیداوار کو یقینی بنانے کیلئے اقدامات پر عملدرآمد کیا جائے، حکومت ملک و قوم کے پیسے کی بچت کیلئے ہر ممکن اقدام اٹھائے گی۔