شمالی کوریا کے حکام نے جزیرہ نما کوریا میں سردی کی لہر کے باعث ملک میں شدید موسمی حالات سے خبردار کیا ہے۔

برطانوی خبر رساں ادارے کی خبر کے مطابق شمالی کوریا کے ایک ریڈیو براڈکاسٹر نے انتباہ جاری کیا ہے جس میں شمالی علاقوں میں درجہ حرارت انتہائی نیچے جانے کا امکان ظاہر کیا گیا ہے۔

شمالی کوریا کے ریڈیو براڈ کاسٹر نے کہا کہ یہ غیر معمولی سرد موسم ملک کے غریب ترین حصے کو متاثر کر سکتا ہے۔

سرکاری میڈیا کے مطابق ساحلی علاقوں میں تیز ہوائیں چلنے کی بھی توقع ہے۔

جنوبی کوریا نے بھی سردی کی لہر کی وارننگ جاری کی ہے جبکہ شمالی چین کو ریکارڈ کم درجہ حرارت کا سامنا ہے۔

اس ہفتے جاپان میں بھی درجہ حرارت ایک دہائی میں اپنی کم ترین سطح پر گرنے کی توقع ہے، اور جاپانی حکومت نے بھی شدید سرد موسم کا الرٹ جاری کیا ہے۔

اگرچہ شمالی کوریا دیگر مقامات کی طرح انتہائی یا منفی موسم سے متاثر ہوا ہے، لیکن اس کے لوگوں پر اس کے اثرات کے بارے میں بہت کم معلوم ہے۔

ملک کے جنوبی ہیمگیونگ، شمالی ہیمگیونگ اور ریانگینگ شمالی کوریا کے غریب ترین صوبے ہیں جو موسمیاتی تبدیلی سے زیادہ متاثر ہو سکتے ہیں۔

برطانوی خبررساں ادارے کے مطابق شمالی کوریا کے دارالحکومت پیانگ یانگ کے باہر بجلی کا استعمال غیر معمولی ہے، اور ان جگہوں کے گھرانوں میں مبینہ طور پر سردیوں کے دوران گرمی کے لیے لکڑیاں، اور خشک پودوں کو جلایا جاتا ہے۔

رپورٹ میں یہ بھی کہا گیا ہے کہ بہت سے لوگ سردی سے بچاؤ کے لیے اپنے دروازوں اور کھڑکیوں کے گرد پلاسٹک کا استعمال کرتے ہیں۔

ریڈیو فری ایشیا نے دسمبر میں اطلاع دی تھی کہ ملک میں بڑی تعداد میں لوگ پچھلے سال کے آخر میں ایک اور انتہائی سردی کے دوران لاپتہ ہو گئے تھے.

خیال کیا جاتا ہے کہ بہت سے لوگ یا تو بھوک سے مر گئے یا منجمد ہو کر موت کے منہ میں چلے گئے، کیونکہ پارہ انجماد سے انتہائی نیچے گر گیا تھا اور علاقے میں خوراک کی کمی ہو گئی تھی۔