پنجاب اسمبلی میں وزیر اعلی کے اعتماد کا ووٹ کے معاملے پر حکومت اور اپوزیشن آمنے سامنے آگئی۔

تفصیلات کے مطابق پی ٹی آئی رہنما مسرت چیمہ نے اپوزیشن کو نشانے پر رکھ لیا۔ انہوں نے کہا کہ عوام اسمبلی میں اپوزیشن کا ڈراما دیکھ رہے ہیں، مخالفین کے کھوٹے سکے ان کا ساتھ دینے کو تیار نہیں ہیں اور مخالفین جانتے ہیں ان کو الیکشن میں شکست ہوگی۔

لیگی رہنما عطا تارڑ نے جوابی وار کرتے ہوئے کہا کہ وزیراعلیٰ پنجاب اعتماد کا ووٹ لینے سے بھاگ رہےہیں، وزیراعلیٰ کو اعتماد کاووٹ لینے سے کون روک رہا ہے، پنجاب اسمبلی میں ہمارے نمبر پورے ہیں، کھوکھلا انسان وزارت اعلیٰ کی کرسی پر براجمان ہے۔

دوسری جانب رانا ثنااللہ نے پنجاب میں گورنر راج لگانے کی دھمکی دیتے ہوئے کہا کہ  پی ٹی آئی غیر آئینی اقدام کرے گی تو حکومت گورنر راج نافذ کر سکتی ہے اور اگر گورنر راج لگ گیا تو اسکا عرصہ 6 مہینے ہوگا۔

جس کے جواب میں صوبائی وزیر داخلہ عمر سرفراز چیمہ نے کہا کہ وفاقی وزراء جو اپنی نااہلی اور ناکامی کو چھپانے کے لئے یہاں آ کر بیانات دے رہے ہیں ، یہ وہ لوگ ہیں جنہوں نے چند روز قبل عدم اعتماد کی تحریک جمع کروائی اور جب اراکین پورے نہیں ہوئے تو تحریک واپس لے لی۔

انہوں نے مزید کہا کہ رانا ثنا اللہ اوچھے ہتھکنڈے استعمال کرنے کی کوشش کر رہے ہیں کہ پی ٹی آئی کے اراکین کو توڑا جا سکے ۔