وزارت حج و عمرہ نے اعلان کیا کہ سعودی عرب میں رہنے والے مسلمان اس سال حج کے لیے آج سے درخواست جمع کرا سکتے ہیں۔

عرب میڈیا کی رپورٹس میں کہا گیا ہے کہ سعودی عرب کی وزارت حج و عمرہ نے مقامی شہریوں اور رہائشیوں کے لیے 4 قسم کے حج پیکجز متعارف کرائے ہیں جو 3984 سعودی ریال سے شروع ہوں گے۔

سعودی عرب کی وزارت حج وعمرہ نے مقامی افراد کو سہولت دیتے ہوئے کہا کہ حج پیکجز کی رقم مکمل یا تین اقساط میں ادا کی جا سکتی ہے۔

سعودی عرب سے درخواست دہندگان کے پاس جولائی کے وسط تک قومی یا رہائشی شناخت درست ہونی چاہیے۔

درخواستوں کے لیے کم از کم عمر 12 سال ہوگی اور ان لوگوں کو ترجیح دی جائے گی جنہوں نے پہلے حج نہیں کیا تھا۔

وزارت نے کہا کہ جہاں جگہیں دستیاب ہوں گی، ان لوگوں کو شامل کیا جائے گا جنہوں نے پہلے حج کیا تھا، اور خواتین کے مرد سرپرستوں کو ترجیحی فائدہ سے باہر رکھا جائے گا۔

حج پر آنے والے زائرین کو مقدس مقامات پر جانے کے لیے کورونا اور موسمی نزلہ کے منفی ٹیسٹ کے علاوہ اے سی وائے ڈبلیو کا ویکسینیشن سرٹیفیکیٹ بھی لازمی دکھانا ہو گا۔

سعودی عرب کی وزارت حج و عمرہ نے تمام درخواست دہندگان پر زور دیا کہ وہ اپنا اندراج براہ راست ویب سائٹ کے ذریعے بھی کر سکتے ہیں، لیکن ایک سے زیادہ درخواستوں کے لیے ایک ہی موبائل نمبر کا استعمال نہ کریں۔