خلاء میں راکٹ بھیجنے والی مشہور کمپنی اسپیس ایکس کا راکٹ آج تکنیکی خرابی کے باعث آخری لمحات میں خلاء میں جانے سے روک دیا گیا۔

غیر ملکی خبر رساں اداے کی خبر کے مطابق ناسا کے بین الاقوامی کینیڈی اسپیس سینٹر سے اسپیس ایکس کا خلاء میں روانہ ہونے والا راکٹ اڑان سے ایک منٹ پہلے روک دیا گیا۔

رپورٹس کے مطابق اسپیس ایکس کے راکٹ میں روانگی سے ایک منٹ قبل تکنیکی خرابی پیدا ہو گئی تھی جس کی وجہ سے فوری طور پر پرواز کو روکنے کا حکم دیا گیا۔

غیر ملکی میڈیا کا کہنا ہے کہ راکٹ کی روانگی کے لیے الٹی گنتی کو کینیڈی اسپیس سینٹر سے پرواز میں صرف دو منٹ باقی رہ گئے تھے، کہ راکٹ کے اگنیشن سسٹم میں خرابی ظاہر ہو گئی۔

اسپیس ایکس کے ترجمان نے فوری طور پر کچھ بتانے سے گریز کیا اور نہ ہی اس بات کا پتہ چل سکا ہے کہ راکٹ کو خلاء میں بھیجنے کی دوبارہ کوشش کب ہو گی، کیونکہ آئندہ آنے والے دنوں میں علاقے میں خراب موسم کی بھی پیش گوئی کی گئی ہے۔

بین الاقوامی خبر رساں ادارے کی رپورٹ میں کہا گیا ہے کہ راکٹ کے کیپسول میں دو روسی اور ایک متحدہ عرب امارات کے خلاباز سمیت چار افراد موجود تھے جنہیں کیپسول سے باہر نکال لیا گیا ہے۔

یہ خلاباز اس راکٹ کے ذریعے ایک مہینے کے مشن پر بین الاقوامی خلائی اسٹیشن جانے والے تھے، جہاں انہیں گزشتہ سال اکتوبر سے خلائی اسٹیشن پر موجود عملے کی جگہ لینی تھی۔