اسلام آباد کی مقامی عدالت نے رہنما پی ٹی آئی شاندانہ گلزارکی عبوری ضمانت قبل ازگرفتاری منظورکرلی۔

تفصیلات کے مطابق ڈسٹرکٹ اینڈ سیشن کورٹس اسلام آباد میں پی ٹی آئی رہنما شاندانہ گلزار پر اداروں کے خلاف اکسانے کے مقدمے میں رہنما تحریکِ انصاف شاندانہ گلزارنے ایڈیشنل سیشن جج عابدہ سجاد کی عدالت میں عبوری ضمانت کی درخواست دائر کردی۔

رہنما تحریکِ انصاف شاندانہ گلزاراپنے وکیل شیرافضل خان کے ہمراہ عدالت پیش ہوئیں اور مؤقف پیش کیا کہ اسلام آباد ہائی کورٹ میں مقدمہ خارج کرنے کی درخواست زیرالتوا ہے۔ امید ہے شاندانہ گلزارکے خلاف آئندہ سماعت تک مقدمہ نہیں رہےگا۔

وکیلِ شاندانہ گلزارنے مؤقف اپنایا کہ وفاقی یا صوبائی حکومتوں کی اجازت کے بغیر بغاوت کی دفعہ نہیں لگائی جاسکتی۔ شاندانہ گلزار کے وکیل نے استدعا کی کہ الزامات جھوٹےہیں، عبوری ضمانت منظورکی جائے۔

ڈسٹرکٹ اینڈ سیشن کورٹس اسلام آباد نے شاندانہ گلزارکی عبوری ضمانت قبل از گرفتاری منظور کرلی۔ شاندانہ گلزارکی عبوری ضمانت 9 مارچ تک دو لاکھ روپے مچلکوں کے عوض منظور کی گئی۔

اسلام آباد کی مقامی عدالت نے آئندہ سماعت پر فریقین کو نوٹس جاری کرتے ہوئے دلائل طلب کرلیے۔ رہنما تحریکِ انصاف شاندانہ گلزار کے خلاف اسلام آباد کے تھانہ وومن میں مقدمہ درج کیا گیا تھا۔