پرویزالہٰی نے کہا ہے کہ مسلم لیگ ن کا آڈیو ڈرامہ بری طرح فلاپ ہوچکا ہے۔

سابق وزیراعلیٰ پنجاب چوہدری پرویز الہٰی سے اسپیکر پنجاب اسمبلی سبطین خان ، راجہ بشارت اور ساجد بھٹی کی ملاقات ہوئی جس میں سیاسی صورتحال اور ملکی معاملات پر بات چیت کی گئی۔

ملاقات میں چوہدری پرویز الہٰی نے مسلم لیگ ن کی عدلیہ مخالف مہم کی مذمت کی۔

اس موقع پر سابق وزیراعلیٰ پنجاب چوہدری پرویزالہٰی نے کہا کہ مسلم لیگ ن مریم نواز کی قیادت میں ایک بار عدلیہ پر حملہ اور ہے، مریم نواز اپنے والد کی روایت کو آگے بڑھا رہی ہے۔

انہوں نے کہا کہ نواز شریف نے سپریم کورٹ پر براہ راست حملہ کیا، اب معزز جج صاحبان کے فون ٹیپ کئے جارہے ہیں، رانا ثنااللہ حکومتی وسائل عدلیہ کے خلاف استمعال کر رہے ہیں۔

چوہدری پرویزالہٰی نے یہ بھی کہا کہ مسلم لیگ ن کا آڈیو ڈرامہ بری طرح فلاپ ہوچکا ہے کچھ نیا سوچیں، پنجاب کے الیکشن میں تاخیر کرنے والے قانونی نتائج بھگتنے کے لیے تیار رہیں۔

ان کا کہنا تھا کہ ججز کی آڈیو مریم نواز کی سرپرستی میں چلنے والے میڈیا سیل نے لیک کی، پہلے نواز شریف نے غنڈوں کے زریعے عدلیہ پر حملہ کیا اب اس کی بیٹی حملہ اور ہے، الیکشن سے بھاگنے والے اب پاکستان سے بھی بھاگیں گے۔

سابق وزیراعلیٰ پنجاب چوہدری پرویزالہٰی کا مزید کہنا تھا کہ غربت ، مہنگائی ، اور بے روزگاری کے مارے عوام اپنا غصہ الیکشن والے دن اتاریں گے اور ایک وقت آئے گا کہ پی ڈی ایم کی تیرہ جماعتوں کے پاس صرف تیرہ ووٹ ہوں گے۔

ملاقات کرنے والوں میں ڈاکٹر زین بھٹی  شیخ شہکاز ، کرنل ( ر) شبیر ، بشیر اے طاہر ، پرویز شاہد بھی شامل تھے۔