وفاقی وزیر احسن اقبال نے کہا ہے کہ پاکستان اس وقت معاشی بحران سے گزر رہا ہے۔

تفصیلات کے مطابق وفاقی وزیر برائے منصوبہ بندی ترقی احسن اقبال کی زیر صدارت  یو ایس پاکستان نالج کاریڈور سکالرشپس میں پیش رفت کا جائزہ  اجلاس ہوا جس میں امریکہ میں مقیم طلبہ و طالبات سے انکے مسائل پر بات چیت کی گئی۔

اجلاس کی صدارت کرتے ہوئے احسن اقبال نے کہا کہ پاکستان اس وقت معاشی بحران سے گزر رہا ہے، گزشتہ حکومت نے ہماری حکومت کے قیام سے دس روز قبل تیسری سہ ماہی کے دوران پیسے نہ ہونے کی دہائی دے دی تھی۔

وفاقی وزیر برائے منصوبہ بندی ترقی نے کہا کہ ہم نے از سر نو ترجیحات کا تعین کیا اور کم وسائل کے باوجود تعلیمی شعبے کو اولیت دی۔

احسن اقبال نے یہ بھی کہا کہ گزشتہ حکومت نے اپنی نا اہلی کی وجہ سے ملکی تاریخ میں پہلی مرتبہ ترقیاتی بجٹ میں کمی کی اور ان کی نا اہلی کی وجہ سے زر مبادلہ کے ذخائر تاریخ کی کم ترین سطح تک پہنچ گئے۔

ان کا کہنا تھا کہ بیرون ملک تعیم حاصل کر نے والے طلبہ و طالبات ملک کا قیمتی سرمایہ ہیں ، ہم اپنے وسائل کو کاٹ کر انکو درپیش مسائل کو حل کریں گے۔

وفاقی وزیر کا یہ بھی کہنا تھا کہ کسی بھی ملک ترقی کا۔انحصار تعلیم اور پڑھی لکھی نوجوان نسل کے کئے بہتر منصوبہ بندی پر ہوتا ہے۔

یہ بھی پڑھیں؛ محدود وسائل کے باوجود حکومت سینٹرز آف ایکسیلینس کی مدد کررہی ہے، احسن اقبال

احسن اقبال نے یہ بھی کہا کہ یو ایس پاکستان نالج کاریڈور اسکالرشپس کی بنیاد وژن 2025 کے تحت رکھی تھی اور یو ایس پاکستان  کا مقصد تزویراتی پہلو سے انسانی وسائل کی فراہمی  بنیاد رکھنا تھا لیکن گزشتہ حکومت نے اس منصوبے میں بھی رکاوٹ ڈالی۔

 وفاقی وزیر برائے منصوبہ بندی ترقی احسن اقبال کا مزید کہنا تھا کہ مجھے پوری امید ہے کہ اس اسکالرشپ سے واپس آنے والے طلبہ و طالبات ملکی ترقی میں اپنا کردار ادا کریں گے۔

اجلاس میں ہائر ایجوکیشن ، وزارت خزانہ ، اسٹیٹ بینک آف پاکستان اور تعلیمی شعبہ سے منسلک سکالرز نے شرکت کی۔