پی سی بی کی جانب سے مکی آرتھر کو آن لائن کوچ بنانے کے بعد اس کے اثرات آنا شروع ہو گئے ہیں۔

ملکی میڈیا کی رپورٹس کے مطابق پاکستان کرکٹ ٹیم کے سات سمندر پار بیٹھے کوچ کی غیر موجودگی کے احساس کو ختم کرنے کے لیے ممکنہ طور پر یاسر عرفات کو جزوقتی کوچ بنانے کا فیصلہ کیا ہے۔  

واضح رہے کہ انگلینڈ میں بیٹھے پاکستان کرکٹ ٹیم کے ٹیم ڈائریکٹر مکی آرتھر کو پاکستانی سرزمین پر اپنے فیصلوں پر عملدرآمد کے لیے کچھ لوگوں کی ضرورت پڑے گی اسی لیے انہوں نے یاسر عرفات کا نام بطور ہیڈ کوچ تجویز کیا ہے۔

میڈیا رپورٹس کے مطابق پاکستان کرکٹ بورڈ نے پاکستان کے سابق آل راؤنڈر یاسر عرفات کو جزوقتی ہیڈ کوچ بنانے کا فیصلہ کر لیا ہے۔

پی سی بی کے ذرائع کا کہنا ہے کہ ٹیم ڈائریکٹر مکی آرتھر نے یاسر عرفات کو کوچنگ کے تمام معاملات دیکھنے کی ہدایات جاری کر دی ہیں۔ 

یاد رہے کہ پاکستان کے سابق ٹیسٹ آل راؤنڈر یاسر عرفات نے حال ہی میں ای سی بی لیول 4 کوچنگ کا امتحان پاس کر لیا ہے، وہ پاکستان کے پہلے ٹیسٹ کرکٹر ہیں جنہوں نے یہ اعزاز اپنے نام کیا ہے۔

پی سی بی کے ذرائع کا یہ بھی کہنا ہے کہ مکی آرتھر نے یاسر عرفات کا نام بولنگ کوچ کے لیے تجویز کیا ہے جس پر پاکستان کرکٹ بورڈ نے آمادگی ظاہر کر دی ہے اور جلد ہی اس کا اعلان بھی کر دیا جائے گا۔

ذرائع کا کہنا ہے کہ سابق آل راؤنڈر یاسر عرفات کا نام مکی آرتھر نے بولنگ کوچ کے لیے تجویز کیا ہے۔

یاد رہے کہ راولپنڈی سے تعلق رکھنے والے پاکستان کے سابق فاسٹ بولر نے 11 ون ڈے، 13 ٹی ٹوئنٹی اور تین ٹیسٹ میچز میں پاکستان کی نمائندگی کی ہے، یاسر عرفات نے ریٹائرمنٹ کے بعد انگلینڈ میں بسیرا کر لیا تھا۔