رانا ثناءاللہ نے کہا ہے کہ چینی باشندوں کو فُول پروف سکیورٹی مہیا کی جائے۔

تفصیلات کے مطابق وفاقی وزیر داخلہ رانا ثناءاللہ خان کی زیر صدارت گوادر میں انسداد دہشت گردی اور غیر ملکی شہریوں کی سکیورٹی کے حوالے سے اہم اجلاس ہوا جس میں وزیر داخلہ کو سکیورٹی انتظامات کے حوالے سے تفصیلی بریفنگ دی گئی۔

اجلاس کی صدارت کرتے ہوئے وفاقی وزیر داخلہ رانا ثناءاللہ خان نے کہا کہ چینی باشندوں کو فُول پروف سکیورٹی مہیا کی جائے،سی پیک کے تحت تمام منصوبوں کا ایک فیصد سکیورٹی کے لئے مختص کیا گیا ہے، اس قانون پر عملدرآمد کو یقینی بنایا جائے۔

رانا ثناءاللہ نے یہ بھی کہا کہ ترجیحی بنیادوں پر سکیورٹی اداروں میں خالی آسامیوں کو پر کیا جائے،سکیورٹی اداروں کی بھرتی میں مقامی افراد کو ترجیح دی جائے۔

وزیر داخلہ رانا ثناءاللہ خان نے مزید کہا کہ ملکی اور غیر ملکی شہریوں کی حفاظت کو یقینی بنانے کے لئے ہر ممکن اقدامات لئے جائیں اور ان پر عملدرآمد میں ہر گز کوتاہی نہ برتی جائے۔

اجلاس میں وفاقی سیکرٹری داخلہ یوسف نسیم کھوکھر، چیف سیکرٹری بلوچستان ، آئی جی بلوچستان اور سکیورٹی اداروں کے نمائندوں نے شرکت کی۔

یاد رہے کہ وزیر داخلہ وزیر اعظم شہباز شریف کی ہدایت پر سکیورٹی انتظامات کا جائزہ لینے کے لئے مختلف شہروں کے دورے پر ہیں۔