پاکستان کرکٹ ٹیم افغانستان کے ساتھ شارجہ میں تین ٹی ٹوئنٹی میچز کھیلے گی، جو افغانستان کے نقصان کی تلافی کے طور پر کھیلی جائے گی۔

تفصیلات کے مطابق پاکستان کرکٹ بورڈ کی مینجمنٹ کمیٹی کے چیئرمین نجم سیٹھی نے تصدیق کی ہے کہ پاکستان مارچ کے آخر میں شارجہ میں افغانستان کے خلاف تین ٹی ٹوئنٹی میچ کھیلے گا۔

یہ میچز افغانستان کرکٹ بورڈ کو معاوضہ دینے کے لیے کھیلے جائیں گے کیونکہ کرکٹ آسٹریلیا نے حکمران طالبان کی جانب سے خواتین اور لڑکیوں کی تعلیم اور ملازمت پر پابندیوں کے خلاف احتجاجاً افغانستان کے خلاف سیریز سے دستبرداری اختیار کر لی تھی۔

نجم سیٹھی نے اپنے ایک ٹوئٹ میں کہا کہ یہ اعلان کرتے ہوئے خوشی ہو رہی ہے کہ پی سی بی افغانستان کے خلاف ٹی ٹوئنٹی سیریز کھیلے گا، جس کا بنیادی مقصد آسٹریلیا کی سیریز سے دستبرداری کے بعد افغانستان کرکٹ بورڈ کو ہونے والے نقصان کو کم کیا جا سکے۔

یاد رہے کہ نجم سیٹھی نے گزشتہ ماہ ایک پریس کانفرنس میں کہا تھا کہ میں نے افغانستان کرکٹ بورڈ کے ایگزیکٹو ممبران سے ملاقات کی اور وہ ہم سے ایک ون ڈے سیریز کھیلنے کے لیے کہہ رہے تھے لیکن ہمیں ون ڈے سیریز کھیلنے میں کوئی دلچسپی نہیں ہے۔

نجم سیٹھی کے مطابق اس کی بنیادی وجہ یہ ہے کہ ون ڈے سیریز  پوائنٹس کے لیے تھی، اور اب اس سے کوئی فرق نہیں پڑے گا کہ کون جیتا ہے۔ اس لیے ہم نے پی ایس ایل کے حکومتی منظوری کے بعد شارجہ میں تین ٹی ٹوئنٹی میچوں کی سیریز کھیلنے پر اتفاق کیا۔

نجم سیٹھی کا مزید کہنا تھا کہ ہم سیریز سے حاصل ہونے والی آمدنی کا 50 فی صد مساوی طور پر بانٹیں گے۔ اور ہم مشترکہ طور پر پیداوار کو آؤٹ سورس کریں گے۔

واضح رہے کہ آسٹریلیا کو افغانستان کے خلاف مارچ میں متحدہ عرب امارات میں تین ون ڈے میچز کھیلنے تھے، جسے آسٹریلین کرکٹ بورڈ نے افغانستان میں خواتین کے خلاف حکومتی قوانین کو جواز بنا کر انکار کر دیا تھا۔