چینی حکومت نے اعتراف کیا ہے کہ جمعے کے روز لاطینی امریکہ پر دیکھا گیا غبارہ چین کا ہے, لیکن دعویٰ کیا ہے کہ یہ شہری استعمال کے لیے ہے۔

برطانوی خبر رساں ادارے کی خبر کے مطابق وزارت خارجہ کے ترجمان ماؤ ننگ نے کہا لاطینی امریکہ کی فضاؤں میں اڑنے والا غبارہ ہمارا ہے جو اپنا راستہ بھٹک گیا تھا۔

واضح رہے کہ اسی طرح کے ایک غبارے کو جاسوسی کے الزام میں ہفتے کے روز امریکی فوجی جیٹ طیاروں نے امریکی فضائی حدود میں مار گرایا تھا۔

چین نے جاسوسی کے الزامات کو مسترد کرتے ہوئے کہا ہے کہ وہ موسم کی نگرانی کر رہا ہے۔

اس واقعے نے واشنگٹن اور بیجنگ کے درمیان سفارتی تنازع کھڑا کر دیا ہے۔

یاد رہے کہ جمعہ کو لڑاکا طیاروں کے غبارے کو تباہ کرنے سے پہلے امریکی فوجی حکام نے کہا تھا کہ لاطینی امریکہ پر بھی دوسرا چینی غبارہ دیکھا گیا ہے۔

آج چین نے اعتراف کیا کہ اس کا ایک غبارہ حادثاتی طور پر لاطینی امریکہ اور کیریبین کی فضائی حدود میں داخل ہوا تھا.

ترجمان ماؤ ننگ نے نامہ نگاروں کو بتایا کہ دوسرا غبارہ اپنے مطلوبہ راستے سے بہت زیادہ ہٹ گیا اور یہ غبارہ موسمی حالات کے لیے استعمال کیا جاتا ہے۔

وزارت خارجہ کی ترجمان ماؤ ننگ نے مزید کہا کہ چین سے آنے والا بغیر پائلٹ کا غبارہ سویلین نوعیت کا ہے اور اسے فلائٹ ٹیسٹ کے لیے استعمال کیا جاتا ہے۔

چینی حکومت کی ترجمان ماؤ ننگ نے کہا کہ چین ایک ذمہ دار ملک ہے اور اس نے ہمیشہ بین الاقوامی قانون کی سختی سے پابندی کی ہے تاکہ کسی بھی ملک کو کوئی خطرہ لاحق نہ ہو.

یاد رہے کہ کولمبیا کی فضائیہ نے کہا کہ 3 فروری کو ملک کی فضائی حدود میں 55 ہزار فٹ سے زیادہ بلندی پر ایک غبارے جیسی خصوصیات والی ایک چیز کا پتہ چلا ہے۔