نیوزی لینڈ کے شمالی علاقے میں آنے والے سمندری طوفان گیبریل کے باعث معمولات زندگی مفلوج ہو کر رہ گئی ہے۔

تفصیلات کے مطابق نیوزی لینڈ کے شمال میں رہنے والے لوگوں نے ایک تکلیف دہ رات گزاری، کیونکہ سمندری طوفان گیبریل کے باعث طوفانی بارشوں اور ہواؤں کے علاوہ علاقے میں بجلی بھی معطل ہے۔

نیوزی لینڈ کے حکام کا کہنا ہے کہ سمندری طوفان سے کم از کم 46,000 گھروں کی بجلی منقطع ہو گئی ہے جبکہ سینکڑوں پروازیں منسوخ کر دی گئی ہیں۔

نیوزی لینڈ کے نو خطوں میں ہنگامی حالت کا اعلان کیا گیا ہے جہاں 5.1 ملین آبادی میں سے تقریبا ایک تہائی سمندری طوفان گیبریل سے متاثر ہوئے ہیں۔

توقع کی جارہی تھی کہ طوفان پیر کی رات اپنے عروج پر ہوگا اور سیلاب کا سلسلہ منگل تک جاری رہے گا۔

مقامی میڈیا نے رپورٹ کیا کہ نیوزی لینڈ کے سب سے بڑے شہر آکلینڈ میں حکام نے پہلے 30 میٹر اونچے ٹاور کے آس پاس کے 50 گھروں سے لوگوں کو نکالا جن کے گرنے کا خطرہ تھا۔

ہنگامی خدمات کے رضاکاروں نے بڑھتے ہوئے پانی میں پھنسے ہوئے لوگوں کی بھی اطلاع دی ہے، حکام کا کہنا ہے کہ اتوار سے اب تک انہیں مدد کے لیے 100 سے زیادہ کالیں موصول ہوئی ہیں۔

سمندری طوفان گیبریل نیوزی لینڈ کے شمال سے ٹکرانے کے چند ہفتوں بعد آکلینڈ اور گردونواح کے علاقوں میں ریکارڈ بارشوں اور سیلاب کا سامنا کرنا پڑا جس میں چار افراد ہلاک ہوئے۔

نیوزی لینڈ کے وزیر اعظم کرس ہپکنز پیر کے روز شمالی شہر میں پھنسے ہوئے لوگوں میں شامل تھے جب دارالحکومت ویلنگٹن اور دیگر جگہوں پر پروازیں منسوخ کردی گئیں۔

وزیر اعظم کرس ہپکنز نے متاثرہ علاقے میں بحالی کے کاموں کے لیے 7.3 ملین ڈالرز کے امدادی پیکج کا بھی اعلان کیا۔

نیوزی لینڈ کی ایمرجنسی مینجمنٹ کے وزیر کیران میک اینلٹی نے کہا کہ حکومت ملکی تاریخ میں صرف تیسری بار قومی ہنگامی حالت کا اعلان کرنے پر غور کر رہی ہے۔