عدالت نے ناظم جوکھیو قتل کیس کے معاملے پرجام اویس کو نااہل قراردینے کی درخواست پر وکیل کو تفصیلی دلائل دینے کی ہدایت کردی۔

تفصیلات کے مطابق سندھ ہائی کورٹ میں ناظم جوکھیو قتل کیس کے معاملے میں پیپلزپارٹی کے رکن سندھ اسمبلی جام اویس کو نا اہل قرار دینے کے لیے درخواست کی سماعت ہوئی۔

وکیل درخواست گزار نے مؤقف اپنایا کہ جام اویس نے مقتول ناظم جوکھیو کے ورثا سے صلح کرکے دیت کی رقم ادا کردی ہے۔  جام اویس کی جانب سے دیت کی رقم ادا کرنے کے بعد وہ صادق اورامین نہیں رہے۔

چیف جسٹس سندھ ہائی کورٹ نے استفسار کیا کہ آپ نے اس حوالے سے سپریم کورٹ کا فیصلہ پڑھا ہے؟ جس پر بیرسٹرعلی طاہر نے جواب دیا کہ ٹرائل کورٹ کے فیصلہ میں لکھا ہے جام اویس نے دیت ادا کی جواعترافِ جرم ہے۔ تعزیرات پاکستان کی شق 53 کے مطابق دیت سزا ہے۔

عدالت نے ریمارکس دیے کہ ہم آپ کو سننا چاہتے ہیں مگر سپریم کورٹ کے فیصلوں کی روشنی میں دلائل دیں۔

عدالتِ عالیہ نے سماعت ایک ہفتہ کیلئے ملتوی کرتے ہوئے درخواست گزارکو تفصیلی دلائل دینے کی ہدایت کردی۔

وکیل درخواست گزارکا کہنا تھا کہ درخواست گزارنے جام اویس کو لیگل نوٹس بھی بھیجا تھا۔ جام اویس پی ایس 79 ٹھٹہ سے رکن سندھ اسمبلی منتخب ہوئے ہیں۔

درخواست گزارنے مؤقف پیش کیا کہ ملزمان کے با اثر ہونے کی وجہ سے پولیس نے شفاف تحقیقات نہیں کیں۔ عدالت سے استدعا ہے کہ جام اویس کونااہل قراردیا جائے۔

واضح رہے کہ درخواست میں جام اویس گہرام، اسپیکر سندھ اسمبلی، چیف سیکریٹری سندھ اور الیکشن کمیشن کو فریق بنایا گیا ہے۔