اے ٹی سی نے پی ٹی آئی رہنما فواد چودھری کی 25 مارچ تک عبوری ضمانت منظورکر لی۔

تفصیلات کے مطابق لاہور میں انسداد دہشت گردی عدالت میں پی ٹی آئی ریلی سے قبل پولیس پرتشدد، قتل دیگر الزامات کے مقدمے میں عدالت نے پی ٹی آئی رہنما فواد چودھری کی 25 مارچ تک عبوری ضمانت منظورکرتے ہوئے فواد چودھری کو 5 لاکھ کے ضمانتی مچلکے جمع کروانے کا حکم دیا ہے۔

اے ٹی سی لاہور نے فواد چودھری کو شامل تفتیش ہونے اور تفتیشی افسر کو آئندہ سماعت پر پیش رفت رپورٹ پیش کرنے کا حکم بھی دیا۔

انسداددہشت گردی عدالت کے جج اعجاز احمد بٹر نے عبوری ضمانت کی درخواست پر سماعت کی، درخواست میں مؤقف اپنایا گیا کہ  پی ٹی آئی رہنماؤں کے خلاف تھانہ ریس کورس پولیس نے دہشتگردی سمیت 12 مختلف دفعات کے تحت مقدمہ درج کیا گیا۔

درخواست میں کہا گیا کہ مقدمہ میں لگائے گئے تمام الزامات بے بنیاد اور جھوٹ ہیں، سیاسی انتقام کا نشانہ بنانے کیلئے جھوٹا مقدمہ درج کیا گیا، گرفتار کا خدشہ ہے۔

درخواست گزارنے استدعا کی کہ مقدمہ میں شامل تفتیش ہونے کیلئے عبوری ضمانت منظور کی جائے اورٹرائل کے حتمی فیصلے تک ضمانت قبل از گرفتاری منظور کی جائے۔

اس سے قبل لاہورہائی کورٹ  نے اعلی عدلیہ کےججزکےخلاف پریس کانفرنس کرنے کے معاملے میں تحریک انصاف کےرہنما فواد چوہدری کےخلاف توہین عدالت کی درخواست خارج کردی۔

جسٹس شجاعت علی خان نے درخواست ناقابل سماعت قرار دیتے ہوئے خارج کی۔ درخواست گزار رانا شاہد ایڈووکیٹ نے دلائل دیے۔