ایلون مسک کی راکٹ کمپنی اسپیس ایکس کا راکٹ چار خلاء بازوں کو لے کر بین الاقوامی خلائی اسٹیشن کی طرف روانہ ہو گیا ہے۔

غیر ملکی میڈیا کے مطابق ٹوئٹر کے مالک ایلون مسک کی راکٹ کمپنی اسپیس ایکس کا ایک راکٹ آج چار خلاء بازوں کو لے کر روانہ ہوا جس میں عرب دنیا کا پہلا شخص بھی شامل ہے۔

ایلون مسک کی راکٹ کمپنی اسپیس ایکس کے راکٹ میں بین الاقوامی اسپیس اسٹیشن پر جانے والے خلاء باز چند ماہ تک اسٹیشن پر قیام کریں گے۔

اسپیس ایکس کا ’فالکن‘ نامی راکٹ آج رات کو امریکی ریاست فلوریڈا کے کیپ کیناویرل میں واقع کینیڈی اسپیس سینٹر سے روانہ ہوا، لوگوں نے کیپ کیناویرل کے مشرقی ساحل کی طرف آسمان پر راکٹ کو جاتے ہوئے دیکھا۔

بین الاقوامی خلائی اسٹیشن خلاء میں زمین سے 420 کلومیٹر کے فاصلے پر گردش کرتا ہے، توقع ہے کہ راکٹ 25 گھنٹوں کی مسافت کے بعد خلائی اسٹیشن پہنچ جائے گا۔

بین الاقوامی خلائی اسٹیشن جانے والے خلاء بازوں میں متحدہ عرب امارات کے سلطان النیادی بھی شامل ہیں، جسے یو اے ای کے تقریباً 80 افراد نے کینیڈی اسپیس سینٹر سے روانہ ہوتے دیکھا، توقع ہے کہ سلطان النیادی 6 ماہ تک بین الاقوامی خلائی اسٹیشن میں قیام کریں گے۔

متحدہ عرب امارات کے پہلے شخص کے خلاء میں جانے کے اس تاریخی موقع کو دبئی کے اسکولوں، دفاتر اور مختلف مقامات کو کینیڈی اسپیس سینٹر سے براہ راست نشر کرنے کا اہتمام کیا گیا۔

واضح رہے کہ پیر کے روز اس راکٹ کی پہلی کوشش انجن کے اگنیشن سسٹم میں تکنیکی خرابی کی وجہ سے آخری لمحات میں روک دی گئی تھی۔

چاروں خلاء باز بین الاقوامی خلائی اسٹیشن پر موجود امریکی، روسی اور جاپانی عملے کی جگہ لیں گے جو گزشتہ سال اکتوبر سے خلائی اسٹیشن پر موجود ہیں۔